សត្វសំពោចក្រអូបមួយគូ នឹងត្រូវដោះលែងបន្ថែម ក្នុងព្រៃធម្មជាតិ នៃឧទ្យានអង្គរ

ខេត្តសៀមរាប ៖ អាជ្ញាធរជាតិអប្សរា រដ្ឋបាលព្រៃឈើភ្នំពេញ និងអង្គការ Wildlife Alliance  បានដឹកជញ្ជូន​សត្វ​សំពោចក្រអូប (Common palm civets)  មួយគូ (ញី១ និងឈ្មោល១) ពីមជ្ឈមណ្ឌលសង្រ្គោះ​សត្វព្រៃភ្នំតាម៉ៅ យកមកផ្សាំងក្នុងទ្រុង ដែលក្រុមការងារគម្រោង​នឹង​ ដោះលែងចូលទៅក្នុងព្រៃធម្មជាតិ នៃឧទ្យានអង្គនៅពេលខាងមុខ។

គម្រោងនេះ ធ្វើឡើងកាលពីថ្ងៃទី៧ ខែកក្កដា ឆ្នាំ២០២៣ គម្រោងដោះលែងសត្វព្រៃ ក្នុងឧទ្យានអង្គរ។

កន្លងមកគម្រោងនេះ ទទួលបានជោគជ័យ ក្នុងការដោះលែងសត្វព្រៃជាច្រើនប្រភេទចូល ក្នុងព្រៃធម្មជាតិ នៃឧទ្យានអង្គរ មានដូចជា សត្វទោចមកុដ(Pileated gibbon) ចំនួន ១៥ក្បាល ​(កើតកូនបានចំនួន៧ក្បាល) សត្វឈ្លូស (Red muntjac) ចំនួន ៦ក្បាល សត្វស្វាព្រាម​(Silvered langurs) ចំនួន ១២ក្បាល សត្វសំពោចក្រអូប(Common palm civets) ចំនួន ៥ក្បាល សត្វភេខ្លួនរលោង(Smooth-coated otter) ចំនួន ៨ក្បាល ​(កើតកូនបានចំនួន៥ក្បាល) សត្វឆ្មារដាវ (Leopard Cat) ចំនួន២ក្បាល កេងកងតូច(Oriental Pied Hornbill) ចំនួន៧ក្បាល កេងកងធំ (Great Hornbill) ចំនួន៦ក្បាល ព្វាំង (Wreathed Hornbill) ចំនួន ៧ក្បាល សត្វក្ងោក(Peafowl) ចំនួន ៩ក្បាល សត្វអន្សង (Common Water Monitor) ចំនួន១ក្បាល និងសត្វផ្សេងៗមួយចំនួនទៀត ដែលមកដល់ឥឡូវសត្វទាំងអស់នេះ​នៅតែមានវត្តមាននៅទីនោះនៅឡើយ ក្រោមការយកចិត្តទុកដាក់តាមដាន និងថែទាំ​ជាប្រចាំ​ពីក្រុមការងារ។

ដើម្បីឲ្យសត្វព្រៃទាំងអស់ បន្តវត្តមាននៅក្នុងព្រៃធម្មជាតិ នៃឧទ្យានអង្គរយើង និងបង្កើនចំនួនបន្ថែមទៀត អាជ្ញាធរជាតិអប្សរា និងគម្រោងដោះលែងសត្វព្រៃ ក្នុងឧទ្យានអង្គរ សូមអំពាវនាវជូនសាធារណជន ភ្ញៀវជាតិ អន្តរជាតិ ជាពិសេសប្រជាពលរដ្ឋ ដែលរស់នៅ​តំបន់នោះ ចូលរួមថែរក្សាសត្វព្រៃទាំងនោះទាំងអស់គ្នា ជៀសវាងពេលប្រទះឃើញ​មានបំណងមិនល្អ បញ្ឈប់ការដាក់អន្ទាក់សត្វគ្រប់ប្រភេទ និងមេត្តាកុំផ្តល់ចំណីឲ្យសត្វទាំងនោះ៕

អត្ថបទ និងរូបភាព៖ នាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ