អ្នកនេសាទខេត្តកោះកុង អះអាងថា បទល្មើសប្រើឧបករណ៍នេសាទខុសច្បាប់ កំពុងធ្វើសកម្មភាពរាល់ថ្ងៃ នៅឃុំថ្មស ស្រុកបូទុមសាគរ
ខេត្តកោះកុង ៖ ប្រជាពលរដ្ឋ ប្រកបរបរធ្វើនេសាទសមុទ្រ បានអះអាងថា បទល្មើសប្រើឧបករណ៍នេសាទខុសច្បាប់ កំពុងធ្វើសកម្មភាពរាល់ថ្ងៃ នៅលើលម្ហសមុទ្រ ក្នុងមូលដ្ឋានឃុំថ្មស ស្រុកបូទុមសាគរ ដោយគ្មានការបង្ក្រាបឬទប់ស្កាត់ឳ្យមានប្រសិទ្ធភាពពី កម្លាំងសមត្ថកិច្ចជំនាញ នៃស្ថាប័នពាក់ព័ន្ធនោះទេ។ បទល្មើសនេះ ប្រជានេសាទរស់នៅមូលដ្ឋានឃុំថ្មស លើកឡើងថា ធ្វើឱ្យប៉ះពាល់ដល់ជីវៈភាពប្រចាំថ្ងៃ របស់ពួកគាត់ ហើយពេលនេះ បាននាំគ្នាផ្តិតស្នាមមេដៃ ដើម្បីត្រៀមដាក់ញតិ ជូនថ្នាក់នាំរដ្ឋបាលខេត្តកោះកុង ជួយមានវិធានការទប់ស្កាត់ ឱ្យបានឆាប់ និងមានប្រសិទ្ធភាព។
ប្រជាពលរដ្ឋចំនួន ៦ភូមិ រួមមាន៖ ភូមិថ្មស ភូមិស្រែត្រាវ ភូមិស្រែថ្មី ភូមិចំការលើ ភូមិចម្លងគោ និងភូមិតានូន ស្ថិតក្នុងឃុំថ្មស និងឃុំតានូន នៃស្រុកបូទុមសាគរ ខេត្តកោះកុង បានអះអាងថា គិតត្រឹមបំណាច់ខែកក្កដា ឆ្នាំ២០២៤នេះ មានរយៈពេលជាង ៤ឆ្នាំហើយ ដែលបទល្មើសប្រើឧបករណ៍នេសាទខុសច្បាប់ របស់បុគ្គល ឬឈ្មួញមួយចំនួន មកពីតំបន់ផ្សេងៗ មាន៖ ខេត្តកែប កំពត និងព្រះសីហនុជាដើម បានចូលមកនេសាទ ក្នុងភូមិសាស្ត្រឃុំថ្មស ប៉ុន្តែបែរជា កម្លាំងសមត្ថកិច្ច នៃនាយកដ្ឋាននគរបាលការពារព្រំដែនទឹក ក៏ដូចជា មន្ត្រីផ្នែកជលផលបូទូមសាគរ និងមន្ត្រីខណ្ឌរដ្ឋបាលជលផលខេត្តកោះកុងជាដើម ទុកបណ្តោយឱ្យធ្វើសកម្មភាពរាល់ថ្ងៃ..។
បុរសវ័យកណ្តាលឈ្មោះ នៅ ធី ស្ថិតក្នុងចំណោមប្រជានេសាទ ជាងមួយរយនាក់ទៀត រស់នៅឃុំថ្មស ស្រុកបូទុមសាគរ ខេត្តកោះកុង បានផ្តិតស្នាមមេដៃ ដាក់ញតិជូន ថ្នាក់ដឹកនាំរដ្ឋបាលខេត្តកោះកុង ឱ្យស្នើសុំបញ្ឈប់សកម្មភាពទូកនេសាទខ្នាតធំៗ, ទូកអូសគូ, ទូកមងហោះ, ទូកលបប្រើសមុខ១០០ ឬលបកន្ទុយកណ្តុរជាដើម កុំឱ្យចូលមកនេសាទនៅតំបន់ទឹករាក់ ក្នុងមូលដ្ឋាននេះឃុំថ្មសទៀត ព្រោះបានប៉ះពាល់ដល់ការធ្វើរបរនេសាទ ជាលក្ខណៈគ្រួសារ របស់ពលរដ្ឋពួកគាត់ធ្ងន់ធ្ងរ។
អ្នកនេសាទ នៅ ធី រៀបរាប់បន្តទៀតថា៖ «ចាប់តាំងពីមានទូកធំៗប្រើឧបករណ៍នេសាទទំនើបៗទាំងនេះ ចូលមកនេសាទនៅតំបន់ទឹករាក់ ក្នុងឆកកំពង់សោម និងថ្មស គឺឧបករណ៍នេសាទខុសច្បាប់ទាំងនេះ បានអូសលិចចូលជ្រៅក្នុងភក់ចន្លោះពី ៣ ទៅ ៥តឹក ដោយប្រមូលយកត្រី តូចធំ ក្តាម បង្គារ និងជីវៈចម្រុះគ្រប់ប្រភេទ គ្មានសល់ទេ គឺរលាយហិនហោចតែម្តង»។
អ្នកនេសាទរូបនេះបន្តថា ការប្រើឧបករណ៍នេសាទទំនើបខុសច្បាប់ គឺក្រៅពីបានបំផ្លាញធនធានជីវៈចម្រុះក្នុងបាតសមុទ្រ វាក៏ប៉ះពាល់ធ្ងន់ធ្ងរ ដល់ការធ្វើរបរនេសាទជាលក្ខណៈគ្រួសារ របស់ពួកគាត់ ដែលប្រើទូកតូចៗ និងឧបករណ៍នេសាទសាមញ្ញៗ ដូចជា៖ មង និងលប ជាដើម សម្រាប់រកប្រាក់ចំណូលចិញ្ចឹមគ្រួសារជាប្រចាំថ្ងៃ។
ចំណែកបុរសអ្នកនេសាទម្នាក់ទៀតឈ្មោះ ទូច វឿន រស់នៅឃុំថ្មស បានឱ្យដឹងដែរថា បច្ចុប្បន្ននេះ ចំពោះការធ្វើរបរនេសាទលក្ខណៈគ្រួសារ ដោយប្រើឧបករណ៍សាមញ្ញៗ ដូចជា៖ ដាក់មងក្តាម មងបង្គារ មងត្រី លប មឹក និងខ្យងជាដើម គឺមិនទទួលបានផលច្រើនដូចពេលមុនទៀតទេ។ លោកបន្តថា ជាង៤ឆ្នាំមកនេះ ទូកនេសាទនេសាទធំៗ ដែលប្រើឧបករណ៍ខុសច្បាប់ បានចូលមកនេសាទតំបន់ទឹករាក់ ហើយបើកបុកពន្លិចទូកនេសាទតូចៗ និងអូសបំផ្លាញឧបករណ៍នេសាទលក្ខណៈគ្រួសារ របស់ពលរដ្ឋក្នុងមូលដ្ឋាននេះ បំផ្លាញចោលអស់រាប់ពាន់ដៃ ក្នុងមួយឆ្នាំៗ។
អ្នកនេសាទរូបនេះ បន្ថែមថា៖ «បច្ចុប្បន្ននេះ ការធ្វើរបរនេសាទរបស់ពលរដ្ឋក្នុងមូលដ្ឋាននេះ មានការធ្លាក់ចុះប្រមាណ ៧០ភាគរយ នាំឱ្យពួកគាត់ បាត់បង់ចំណូលប្រចាំថ្ងៃ និងពិបាករកលុយបង់ធនាគារ ដែលបានខ្ចីមកធ្វើដើមទុនរកស៊ី»។
លោក ទូច វឿន បានរំលឹកថា កាលពីខែមេសា និងខែឧសភា ឆ្នាំ២០២៤ មានទូកធំៗប្រើឧបករណ៍ទំនើបៗជាច្រើនគ្រឿង បានចូលមកនេសាទតំបន់ទឹករាក់ ក្នុងឆកសមុទ្រកំពង់សោម និងតំបន់ថ្មស នៃស្រុកបូទុមសាគរ ហើយបើកបុកទូកនេសាទពួកគាត់ និងអូសបំផ្លាញមងក្តាម មងត្រី មងបង្គារ លបខ្យង និងមឹក អស់ជាង ២០០ដៃ ដោយក្នុងមួយដៃៗមានតម្លៃ ៧ម៉ឺនរៀល ប៉ុន្តែសមត្ថកិច្ចឬអាជ្ញាធរមូលដ្ឋាន និងមន្ត្រីជំនាញជលផល ហាក់មិនសូវជួយដល់ពួកគាត់ទេ។
អ្នកនេសាទម្នាក់ទៀតឈ្មោះ ហម ធឿន រស់នៅឃុំតានូន បញ្ជាក់ថា បទល្មើសនេសាទ ដែលចូលមកធ្វើសកម្មភាពនៅស្រុកបូទុមសាគរ គឺអ្នកនេសាទពួកគាត់ ក៏ធ្លាប់ស្នើសុំកិច្ចអន្តរាគមន៍ទៅ សមត្ថកិច្ចនិងអាជ្ញាធរឃុំថ្មស ជាពិសេសមន្ត្រីជំនាញរដ្ឋបាលជលផល ខេត្តកោះកុង ឱ្យជួយទប់ស្កាត់ជាបន្តបន្ទាប់ ប៉ុន្តែមិនទទួលបានលទ្ធផលទេ។ ហើយបុគ្គល ឬឈ្មួញនេសាទ ប្រើទូកធំៗបំពាក់ឧបករណ៍នេសាទខុសច្បាប់ទាំងនោះ បានបន្តចូលមកនេសាទតំបន់ទឹករាក់ ក្នុងមូលដ្ឋាននេះ បន្តកើតមានជារៀងរាល់យប់។
ត្រង់ចំណុចនេះ អ្នកនេសាទ ហម ធឿន លើកជាចម្ងល់ថា៖ «តើមានមូលហេតុអ្វី បានជាមន្ត្រីជំនាញស្ថាប័នពាក់ព័ន្ធ លើការងារចុះបង្ក្រាបបទល្មើស បំផ្លាញធនធានធម្មជាតិ ជីវៈចម្រុះបាតសមុទ្រ ជាពិសេសមច្ឆាសមុទ្រគ្រប់ប្រភេទ មិនព្រមចុះបង្ក្រាបទូកនេសាទធំៗ ប្រើឧបករណ៍ខុសច្បាប់ទាំងនោះ ហើយបែរជាទុកឲ្យធ្វើសកម្មភាព ក្នុងដែនសមុទ្រនៅឆកសមុទ្រកំពង់សោម និងតំបន់ថ្មស រហូតមកដល់ពេលនេះ ទៅវិញ?»។
ទាក់ទិនបញ្ហានេះ លោក តេង ហាន់ ប្រធានសហគមន៍នេសាទ តំបន់ឆ្នេរឃុំថ្មស ស្រុកបូទុមសាគរ ទទួលស្គាល់ថា ពិតជាមានករណីទូកនេសាទធំៗប្រើឧបករណ៍ខុសច្បាប់ ចូលមកនេសាទ ក្នុងមូលដ្ឋានឃុំថ្មស ពិតមែន។ លោកបញ្ជាក់ថា៖ «កន្លងមកធ្លាប់ឃើញមន្ត្រីជំនាញពាក់ព័ន្ធ មានកម្លាំងនគរបាលការពារព្រំដែនទឹក , មន្ត្រីផ្នែកជលផលបូទុមសាគរ និងមន្ត្រីខណ្ឌរដ្ឋបាលជលផលខេត្តកោះកុង ជាដើម បានចុះបង្ក្រាបបទល្មើសទាំងនោះ ជាបន្តបន្ទាប់ដែរ ប៉ុន្តែហាក់គ្មានប្រសិទ្ធភាពទេ ខ្ញុំ ក៏ឆ្ងល់ដែរ»។
ប្រធានសហគមន៍នេសាទរូបនេះ ហាក់មានការរារែកមិនចង់ធ្វើអត្ថាធិប្បាយច្រើនទេជុំវិញបទល្មើសនេសាទនេះ រួចក៏បង្វែសំណួរ របស់អ្នកសារព័ត៌មាន ឲ្យសួរទៅ កម្លាំងសមត្ថកិច្ច វរៈសេនាតូចនគរបាលការពារព្រំដែនទឹក លេខ២៦៩ និងមន្ត្រីជំនាញជលផលជំនួសវិញ ព្រោះស្ថាប័នទាំងនេះ មានទីស្នាក់ការប្រចាំការ នៅឃុំថ្មស ស្រុកបូទុមសាគរ ជិតទីតាំងកើតមានបទល្មើសស្រាប់។
ទាក់ទិនបញ្ហានេះ មេឃុំថ្មស លោក អ៊ិក កួន មានប្រសាសន៍ថា ពិតជាមានបទល្មើសនេសាទខុសច្បាប់ ចូលមកនេសាទក្នុងភូមិសាស្ត្រស្រុកបូទុមសាគរពិតមែន។ ហើយករណីនេះ គឺជាកង្វល់របស់ប្រជាពលរដ្ឋក្នុងមូលដ្ឋាននេះ ដែលមានរបរជាអ្នកនេសាទសមុទ្រ ដើម្បីរកប្រាក់ចំណូលចិញ្ចឹមគ្រួសារ។ លោកថាករណីនេះ មន្ត្រីជំនាញពាក់ព័ន្ធ ក៏ធ្លាប់បានជួបប្រជុំគ្នា ដើម្បីរិះរកវិធីដោះស្រាយ ជាបន្តបន្ទាប់ដែរ ប៉ុន្តែបទល្មើសនេះនៅតែបន្តកើតមានដដែល។
លោកមេឃុំថ្មស បន្ថែមថា ៖ «មិនដឹងជាសមត្ថកិច្ចជំនាញនីមួយៗ ពិសេសខណ្ឌរដ្ឋបាលជលផលខេត្តកោះកុង សហការគ្នាធ្វើការយ៉ាងម៉េចទេ ទើបបានជា ទូកអូសគូ ទូកលបប្រើសមុខ១០០ និងទូកមងហោះជាដើម លុបបំបាត់មិនបាន និងបន្តកើតមានរហូតមកដល់សព្វថ្ងៃ។ ករណីនេះ ខាងអាជ្ញាធរឃុំ គ្មានលទ្ធភាពចុះទៅបង្ក្រាបនៅលើលម្ហសមុទ្រទេ គឺមានតែជំនាញជលផលហ្នឹងឯង»។
លោកមេឃុំថ្មស សំណូមពរថា កម្លាំងសមត្ថកិច្ចពាក់ព័ន្ធ ដែលទទួលខុសត្រូវលើការងារបង្ក្រាបបទល្មើសបំផ្លាញធនធានធម្មជាតិ ជីវៈចម្រុះបាតសមុទ្រ ជាពិសេសមច្ឆាសមុទ្រ គួរពង្រឹងការងារល្បាតចុះបង្ក្រាបបទល្មើសប្រើឧបករណ៍នេសាទខុសច្បាប់ ដែលកំពុងធ្វើសកម្មក្នុងដែនសមុទ្រ នាមូលដ្ឋានស្រុកបូទុមសាគរ ឳ្យបានម៉ឺងម៉ាត់ ទើបទទួលជោគជ័យ។
យ៉ាងណាក្តី លោក វ៉ាន់ ថុង មន្ត្រីខណ្ឌរដ្ឋបាលជលផល ខេត្តកោះកុង ទទួលស្គាល់ថា ពិតជាបទល្មើសនេសាទ បានចូលមកធ្វើសកម្មភាពក្នុងដែនសមុទ្រ នាមូលដ្ឋានឃុំថ្មស ស្រុកបូទុមសាគរពិតមែន ប៉ុន្តែបទល្មើសនេះ មន្ត្រីជំនាញជលផល បានសហការណ៍ចុះបង្ក្រាប និងឃាត់ចាប់ទូកនេសាទខុសច្បាប់ទាំងនោះ បានជាច្រើនករណី។ ជាក់ស្តែងកាលពីថ្ងៃទី២៧ ខែកក្កដា មន្ត្រីខណ្ឌជលផល បានចុះបង្ក្រាបនិងឃាត់ទូកនេសាទប្រើឧបករណ៍ខុសច្បាប់ចំនួនពីរគ្រឿង និងរឹបអូសយកលបប្រើសមុខ១០០ ជាង ៣០០ដៃ យកទៅរក្សាទុក និងតម្រូវឲ្យម្ចាស់ទូកនេសាទខុសច្បាប់នោះ ធ្វើកិច្ចសន្យាបញ្ឈប់ប្រើឧបករណ៍ខុសច្បាប់នេះតទៅទៀត។
លោក វ៉ាន់ ថុង បញ្ជាក់ថា៖ «មន្ត្រីជំនាញរបស់លោកមានគ្នាតិច ត្រឹមតែពីបីនាក់ ហើយការងារត្រូវចុះអនុវត្តមានច្រើន។ ជាពិសេសមិនមានមធ្យោបាយគ្រប់គ្រាន់ សម្រាប់ចុះបង្ក្រាបបទល្មើសឲ្យបានទាន់ចិត្តទេ ពេលមានបទល្មើសកំពុងធ្វើសកម្មភាពនៅលើលម្ហសមុទ្រ»។
លោកឧត្តមសេនីយ៍ឯក ទូច ពលៈ ប្រធាននាយកដ្ឋាននគរបាលការពារព្រំដែនទឹក និងជាអគ្គលេខាធិការរង នៃគណៈកម្មាធិការជាតិសន្តិសុខលម្ហសមុទ្រ មិនធ្វើអត្ថាធិប្បាយជុំវិញបទល្មើសនេសាទកំពុងកើតមាន នៅក្នុងមូលដ្ឋានស្រុកបូទុមសាគរនេះទេ ដោយបានណែនាំឳ្យ «កម្ពុជាថ្ងៃនេះ» ទាក់ទងទៅ លោកវរៈសេនីយត្រី ផាន់ កណ្ណារ៉ាត់ អនុប្រធាននាយកដ្ឋាននគរបាលការពារព្រំដែនទឹក និងលោកវរៈសេនីយឯក ស៊ិន ដារ៉ូ មេបញ្ជាការវរៈសេនាតូចនគរបាលការពារព្រំដែនទឹក លេខ២៦៩ ប្រចាំការនៅឃុំថ្មស ស្រុកបូទុមសាគរ ដើម្បីផ្តល់ព័ត៌មានជុំវិញ។ ប៉ុន្តែលោកថា នឹងពិនិត្យតាមដានលើករណី បទល្មើសនេសាទនេសាទ កំពុងធ្វើសកម្មភាពនៅឃុំថ្មស ដែលពលរដ្ឋក្នុងមូលដ្ឋាននេះ បានស្នើសុំកិច្ចអន្តរាគមន៍ចុះបង្ក្រាប នៅពេលក្រោយ។
ទោះជាបែបនេះក្តី លោកវរៈសេនីយត្រី ផាន់ កណ្ណារ៉ាត់ អនុប្រធាននាយកដ្ឋាននគរបាលការពារព្រំដែនទឹក ទទួលបន្ទុក វរៈសេនាតូចនគរបាលការពារព្រំដែនទឹក លេខ២៦៩ មានមូលដ្ឋាននៅឃុំថ្មស ស្រុកបូទុមសាគរ មិនធ្វើអត្ថាធិប្បាយទេ ជុំវិញបទល្មើសនេសាទប្រើឧបករណ៍ខុសច្បាប់ កំពុងធ្វើសកម្មភាពក្នុងឆកសមុទ្រកំពង់សោម និងតំបន់ឃុំថ្មសនេះ។ លោកចាត់ទុកបទល្មើសនេះ ជារឿងរបស់សហគមន៍នេសាទ។ រីឯ លោកវរៈសេនីយឯក ស៊ិន ដារ៉ូ មេបញ្ជាការវរៈសេនាតូចនគរបាលការពារព្រំដែនទឹក លេខ២៦៩ ប្រចាំស្រុកបូទុមសាគរ ក៏មិនធ្វើអត្ថាធិប្បាយដែរ ព្រោះកំពុងទៅសម្រាកព្យាបាលជំងឺនៅប្រទេសថៃ។
នាយរងផ្នែកជលផលបូទុមសាគរ លោក ប៉ រ៉ានី ថ្លែងថា ចំពោះការងារបង្ក្រាបបទល្មើសនេសាទនៅឃុំថ្មស ខាងមន្ត្រីជំនាញជលផល បានបន្តសហការជាមួយ អាជ្ញាធរមូលដ្ឋាន និងសមត្ថកិច្ចជំនាញដទៃទៀត ចុះបង្ក្រាបជាប្រចាំ និងឃាត់ខ្លួនអ្នកជាប់ពាក់ព័ន្ធឳ្យធ្វើកិច្ចសន្យា និងដកហូតឧបករណ៍នេសាទខុសច្បាប់ទាំងនោះ យកទៅរក្សាទុក បានជាច្រើនករណី។ យ៉ាងណាលោកថា ក្នុងរយៈពេលចុងក្រោយនេះ តំបន់សមុទ្រនៅតំបន់ថ្មស ស្រុកបូទុមសាគរ មានភ្លៀងធ្លាក់ជាប់រហូត ដែលបង្កផលវិបាកដល់ការងារចុះល្បាត បង្ក្រាបបទល្មើសផ្សេងៗ។
«កម្ពុជាថ្ងៃនេះ» មិនទាន់អាចទាក់ទង លោកស្រី អែម សុធារ៉ា ប្រធានស្តីទីមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង ដើម្បីបញ្ជាក់ជុំវិញ គម្រោងដាក់ញតិ របស់ប្រជានេសាទ រស់នៅឃុំថ្មស បានទេតាមទូរស័ព្ទ កាលពីថ្ងៃទី៣០ ខែកក្កដា ឆ្នាំ២០២៤ ព្រោះលោកស្រីជាប់រវល់ប្រជុំ។
អ្នកសម្របសម្រួលអង្គការលីកាដូ ខេត្តកោះកុង លោក ហ៊ួរ អ៊ីន បានឲ្យដឹងដែរថា រូបលោកក៏បានទទួលព័ត៌មាន ជុំវិញករណីបទល្មើសនេសាទប្រើឧបករណ៍ខុសច្បាប់ ចូលមកនេសាទ ក្នុងដែនសមុទ្រខេត្តកោះកុង ត្រង់ចំណុចមូលដ្ឋានឃុំថ្មស ស្រុកបូទុមសាគរនេះដែរ។ ហើយករណីនេះ ប្រជានេសាទទាំងនោះ ក៏កំពុងផ្តិតស្នាមមេដៃ ដើម្បីត្រៀមដាក់ញតិ ជូនថ្នាក់ដឹកនាំរដ្ឋបាលខេត្តកោះកុង និងមន្ត្រីកសិកម្មខេត្តផង ដើម្បីស្នើឲ្យជួយអន្តរាគមន៍បញ្ឈប់ទូកនេសាទធំៗ ប្រើឧបករណ៍ទំនើបៗខុសច្បាប់ទាំងនោះ ឳ្យមានប្រសិទ្ធភាព ព្រោះបានប៉ះពាល់ដល់ការធ្វើរបរនេសាទជាលក្ខណៈគ្រួសារ របស់ពួកគាត់។
លោកបន្ថែមថា ៖ «អាជ្ញាធរខេត្តកោះកុង គួរខិតខំរកដំណោះស្រាយ ដើម្បីឲ្យប្រជាពលរដ្ឋ អាចធ្វើនេសាទឲ្យដូចដើមឡើងវិញ ព្រោះ ពលរដ្ឋរស់នៅតំបន់នោះ គឺពឹងផ្អែកតែទៅលើការធ្វើរបរនេសាទតែមួយមុខទេ។ អញ្ចឹងបើកាលណា ធ្វើនេសាទមិនបានផល នឹងប៉ះពាល់ដល់ជីវៈភាពប្រចាំថ្ងៃ របស់ពួកគាត់ធ្ងន់ធ្ងរ ដែលពលរដ្ឋភាគច្រើន បានខ្ចីលុយធនាគារ មកបង្កើតមុខរបររកស៊ី»។
យ៉ាងណាក៏ដោយចុះ ប្រជាពលរដ្ឋរស់នៅឃុំថ្មស ស្រុកបូទុមសាគរ ដែលបានផ្តិតស្នាមមេដៃប្រមាណជិត ១៥០នាក់ មានជំនឿថា នៅពេលញតិរបស់ពួកគាត់ បានទៅដល់ដៃ ថ្នាក់ដឹកនាំរដ្ឋបាលខេត្តកោះកុង ដែលគ្រោងដាក់ជូននៅខែសីហាខាងមុខនេះ នឹងត្រូវបានលើកយកពិនិត្យដោះស្រាយ និងឈានទៅលុបបំបាត់បទល្មើសនេសាទ ប្រើឧបករណ៍ខុសច្បាប់ ដែលកំពុងធ្វើសកម្មភាពនៅឆកកំពង់សោម និងតំបន់ថ្មស ឳ្យបានជាស្ថាពរ ខណៈបទល្មើសនេះ បានអូសបន្លាយជាង ៤ឆ្លាំកន្លងមកហើយៗ កម្លាំងសមត្ថកិច្ចជំនាញស្ថាប័នពាក់ព័ន្ធ ហាក់មិនសូវរវល់អើពើពីកង្វល់ របស់ប្រជានេសាទពួកគាត់ទេ៕ ដោយ ៖ ដែន អយុធ្យា
