ឧកញ៉ា ទៀ វិចិត្រ បន្តលែងអណ្តើកសមុទ្រធំមួយក្បាលទៀត ក្នុងផែនការអភិរក្សសត្វកម្រនៅកម្ពុជា
ខេត្តព្រះសីហនុ ៖ លោកឧកញ៉ា ទៀ វិចិត្រ ប្រធានសាខាគណបក្សប្រជាជនកម្ពុជា ភ្នាក់ងារដឹកជញ្ជូនទេសចរណ៍ជលយានខេត្តព្រះសីហនុ មានប្រសាសន៍ថា កាលពីថ្ងៃទី២០ ខែតុលា ឆ្នាំ២០២២ រូបលោក បានទទួលសត្វអណ្តើកសមុទ្រធំ ( ល្មិច ឬក្រាស់) មួយក្បាលទៀត ពីប្រជាពលរដ្ឋ ដើម្បីឲ្យរូបលោក នាំយកទៅលែង ឲ្យរស់នៅក្នុងសមុទ្រធម្មជាតិវិញ ស្របតាមផែនការអភិរក្សសត្វកម្រ របស់លោក ដែលបានអនុវត្តជាបន្តបន្ទាប់មកនេះ។ លោកបន្តថា ការព្រលែងសត្វអណ្តើកសមុទ្រ(ក្រាស់) នៅពេលនេះ គឺជាលើកទី១៣៤ របស់លោកហើយ។
លោកឧកញ៉ា បន្តថា គ្រប់ពេលដែលរូបលោកនាំយកអណ្តើកសមុទ្រ លែងចូលក្នុងសមុទ្រម្តងៗ គឺតែងបានកឹបសៀលតាមបច្ចេកទេស សម្រាប់សម្គាល់សត្វអណ្តើកសមុទ្រ ប្រភេទ ល្មិចឬក្រាស់ ដែលត្រូវបានលែងក្នុងសមុទ្រឡើងវិញ ដែលជាសញ្ញាសម្គាល់ ក្នុងគោលការណ៍អភិរក្សសត្វសមុទ្រកម្រ ជាអន្តរជាតិ។ ហើយថា សៀល ដែលកឹបលើសត្វអណ្តើកសមុទ្រ(ក្រាស់) មួយក្បាលនេះ គឺ KH 0801។
លោកឧកញ៉ា ទៀ វិចិត្រ បន្តថា កន្លងមក សត្វអណ្តើកសមុទ្រ ប្រភេទ ល្មិចឬក្រាស់ ដែលលោកឧកញ៉ា ទទួលបានភាគច្រើនពីអ្នកនេសាទ គឺមិនទាន់មានកឹបសៀលនោះទេ ទើបលោកឧកញ៉ា បានរៀបចំធ្វើការកឹបសៀលឲ្យបានត្រឹមត្រូវ មុនពេលនាំយកទៅលែងឲ្យរស់នៅក្នុងសមុទ្រ ឬព្រែកទឹកប្រៃ ជាលក្ខណៈធម្មជាតិវិញ។
លោកថា ការកិបសៀលសម្គាល់នេះ គឺវាមានសារៈសំខាន់ណាស់ ព្រោះប្រសិនបើមានការនេសាទ បានសត្វសត្វអណ្តើកសមុទ្រ ប្រភេទ ល្មិចឬក្រាស់ ដែលអ្នកនេសាទ ឃើញមានកិបសៀលសម្គាល់ គឺអ្នកនេសាទទាំងនៅក្នុងប្រទេសកម្ពុជា ឬអ្នកនេសាទតាមបណ្តាប្រទេសនានា នឹងលែងសត្វអណ្តើកនោះ ចូលទៅក្នុងទឹកសមុទ្រវិញ ដោយមិនសម្លាប់ ឬលក់ដូរធ្វើអាជីវកម្មនោះទេ។
លោកឧកញ៉ា ទៀ វិចិត្រ ដែលជាប្រធានក្រុមហ៊ុន ជី,ធី,វី,ស៊ី ផងនោះ បានថ្លែងអំណរគុណដល់ស្មារតីសហការ របស់បងប្អូនប្រជានេសាទ ដែលចូលរួមជួយការពារអភិរក្សសត្វសមុទ្រកម្រជាសកល នៅកម្ពុជា ជាមួយរូបលោក ក៏ដូចជា ជាមួយក្រសួងស្ថាប័នពាក់ព័ន្ធជាបន្តបន្ទាប់មកនេះ៕
