ខេត្តត្បូងឃ្មុំ ៖ ក្រុមប្រជាពលរដ្ឋ បានអះអាងថា តំបន់ប្រវត្តិសាស្រ្តដើមពោធិ៍ទុំទាវ (រឿងទុំទាវ) ដែលមានទីតាំង នៅភូមិជើងខាល ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ បន្ទាប់ពីមិនឃើញមាន អាជ្ញាធរស្ថាប័នពាក់ព័ន្ធផ្នែកណាមួយ ជួយឈឺឆ្អាលលើការងារអភិរក្ស ឬកសាងអ្វីទាល់តែសោះនោះ បច្ចុប្បន្ន ត្រូវបានប្រជាពុទ្ធបរិស័ទ ឬប្រជាពលរដ្ឋ រស់នៅក្នុងមូលដ្ឋានខាងលើនេះ បានរួមសហការគ្នា រៃអង្គាសលុយ ដើម្បីយកស្ថាបនាផ្លូវលំ និងសាងសង់ទីសក្ការៈ ឬកន្លែងសម្រាប់គោរពបូជា ដោយខ្លួនឯង។
ក្រុមប្រជាពលរដ្ឋ បានឲ្យគេហទំព័រ «កម្ពុជាថ្ងៃនេះ» ដឹងនៅថ្ងៃពុធ ទី២០ ខែមីនា ឆ្នាំ២០២៤ថា ដោយសារតែតំបន់ប្រវត្តិសាស្ត្រមួយនេះ ហាក់ត្រូវបានអាជ្ញាធរស្ថាប័នពាក់ព័ន្ធបំភ្លេចចោល ដោយគ្មានការអភិវឌ្ឍន៍កែលម្អអ្វីទាល់តែសោះនោះ ទើបពួកគាត់ បានរួមសហការគ្នាប្រមូលលុយ ដើម្បីកសាងផ្លូវលំ និងស្ថាបនាទីសក្ការៈ ទុកសម្រាប់គោរពបូជា ទៅតាមប្រពៃណីតាំងពីដូនតា ឬដើម្បីទុកសម្រាប់កូនចៅជំនាន់ក្រោយ ក៏ដូចជាភ្ញៀវទេសចរជាតិ-អន្តរជាតិ ចូលមកទស្សនា និងគោរពបូជាទៅតាមជំនឿរៀងៗខ្លួន។
ប្រជាពលរដ្ឋបន្តថា តំបន់ប្រវត្តិសាស្ត្រដើមពោធិ៍ទុំទាវ ពិតជាត្រូវបានអាជ្ញាធរមូលដ្ឋាននេះ បំភ្លេចចោល ខណៈ លោក ជាម ច័ន្ទសោភ័ណ អភិបាលខេត្តត្បូងឃ្មុំ ក៏ធ្លាប់បានសន្យាថា នឹងប្រែក្លាយតំបន់ប្រវត្តិសាស្ត្រមួយនេះ ឲ្យក្លាយទៅជាតំបន់ទេសចរណ៍ សម្រាប់ទាក់ទាញភ្ញៀវទេសចរជាតិ និងអន្តរជាតិ ឲ្យចូលមកទស្សនា នាថ្ងៃអនាគត។ ប៉ុន្តែការសន្យា របស់លោកអភិបាលខេត្តត្បូងឃ្មុំ បានអូសបន្លាយពេលតាំងពីឆ្នាំ២០២១ រហូតមកដល់ដើមឆ្នាំ២០២៤ គឺស្ងាត់ឈឹងតែម្តង។
ក្រុមប្រជាពលរដ្ឋ រៀបរាប់ទៀតថា ដោយសង្កេតឃើញ មិនមានថ្នាក់ដឹកនាំរដ្ឋបាលខេត្តត្បូងឃ្មុំ ក៏ដូចជា អាជ្ញាធរស្ថាប័នពាក់ព័ន្ធ មិនរវល់អើពើលើការងារអភិរក្ស ឬស្ថាបនាទីសក្ការៈ គោរពបូជា ក៏ដូចជាផ្លូវចេញ-ចូលទៅ នៅតំបន់ប្រវត្តិសាស្ត្រដើមពោធិ៍ទុំទាវនេះ ទើបពួកគាត់ បានសហការរៃអង្គាសលុយគ្នា ដើម្បីអភិវឌ្ឍន៍ ឬប្រែក្លាយតំបន់ប្រវត្តិសាស្ត្រ នៅភូមិជើងខាលនេះ ដោយខ្លួនឯង។ ហើយជាជំហ៊ានដំបូង បានរួមគ្នាសង់ទីសក្ការៈពីថ្មប្រកក្បឿង ទុកសម្រាប់ ឲ្យប្រជាពុទ្ធបរិស័ទជិតឆ្លាយ ឬភ្ញៀវទេសចរ ចូលមកទស្សនា និងគោរពបូជា។
យ៉ាងណា គេហទំព័រ «កម្ពុជាថ្ងៃនេះ» នៅមិនទាន់អាចសុំការបំភ្លឺពី លោក ជាម ច័ន្ទសោភ័ណ អភិបាលខេត្តត្បួងឃ្មុំ ជុំវិញការងារអភិរក្ស ក៏ដូចជាការស្ថាបនាទីសក្ការៈបូជា នៅលើទីតាំងប្រវត្តិសាស្ត្រដើមពោធិ៍ទុំទាវ នៅភូមិជើងខាល ខាងលើបានទេ នៅព្រឹកថ្ងៃទី២០ ខែមីនា ឆ្នាំ២០២៤នេះ។
កាលពីអំឡុងខែឧសភា ឆ្នាំ២០២១ ដើមពោធិ៍មួយដើម ឬដើមពោធិ៍ទុំទាវ (ដើមពោធិ៍អ្នកតាក្រហមក) ដែលមានរៀបរាប់នៅក្នុងប្រវត្តិរឿងទុំទាវ ត្រូវបានដួលរលំដោយខ្យល់កន្រ្តាក់។ ក្រោយការដួលរលំភ្លាមៗ ធ្វើឲ្យមានការចាប់អារម្មណ៍យ៉ាងខ្លាំងពីសំណាក់ ប្រជាពលរដ្ឋនៅទូទាំងប្រទេស ក្នុងនោះ អាជ្ញាធររដ្ឋបាលខេត្តត្បូងឃ្មុំ ក៏បានចុះមកពិនិត្យ និងបានស្ទូចដើមពោធិ៍នោះ ដាំឡើងវិញ។
ព្រមជាមួយគ្នានេះ លោក ជាម ច័ន្ទសោភ័ណ អភិបាលខេត្តត្បូងឃ្មុំ ក៏បានសន្យា នឹងបន្តអភិរក្សតំបន់់នេះ ឲ្យប្រែក្លាយជា តំបន់ទេសចរណ៍ប្រវត្តិសាស្ត្រ ថែមទៀតផង។ ប៉ុន្តែបើគិតមកដល់ដើមឆ្នាំ២០២៤ មិនទាន់ឃើញ អាជ្ញាខេត្តត្បូងឃ្មុំ ពិសេស លោក ជាម ច័ន្ទសោភ័ណ ចាត់ក្រុមការងារឲ្យចុះមក អភិវឌ្ឍន៍តំបន់ប្រវត្តិសាស្ត្រនេះទេ។ ហើយ សូម្បីតែ ផ្លូវធ្វើដំណើរ បត់ចេញពីផ្លូវជាតិលេខ៧ ចូលទៅតំបន់ដើមពោធិ៍ទុំទាវ ដែលមានចំងាយជាង ១០០ម៉ែត្រ ក៏មិនបានជួសជុល ដើម្បីសម្រួលដល់ការធ្វើដំណើរ របស់ប្រជាពលរដ្ឋ ឬអ្នកទេសចរដែរ។
ទាក់ទិនបញ្ហានេះ លោក សេង សុខឃឿន អភិបាលស្រុកត្បូងឃ្មុំ ធ្លាប់ប្រាប់ប្រព័ន្ធផ្សព្វផ្សាយថា មូលហេតុដែលយឺតយ៉ាវក្នុងការស្ថាបនាផ្លូវ ឬទីសក្ការៈបូជា នៅតំបន់ប្រវត្តិសាស្ត្រដើមពោធិ៍ទុំទាវ ដ៏ដោយសារតែគម្រោងអភិវឌ្ឍន៍ តំបន់ប្រវត្តិសាស្ត្រនេះ បានប៉ះពាល់ដល់ដីកម្មសិទ្ធិ របស់ប្រជាពលរដ្ឋ ដែលមានព្រំជាប់គ្នា ទើបទាមទារពេលវេលា ធ្វើការសម្របសម្រួលដោះស្រាយឲ្យរួចរាល់ជាមុន។ ជាងនេះទៀត ចំពោះការងារអភិរក្សតំបន់ប្រវត្តិសាស្ត្រខាងលើនេះ គឺខាងមន្ទីរវប្បធម៌ និងវិចិត្រសិល្បៈ ខេត្តត្បូងឃ្មុំ ជាអ្នកទទួលខុសត្រូវ។
ឆ្លើយតបបញ្ហានេះ លោក គួ ហុក ប្រធានមន្ទីវប្បធម៌ និងវិចិត្រសិល្បៈខេត្តត្បូងឃ្មុំ បានប្រាប់គេហទំព័រ «កម្ពុជាថ្ងៃនេះ» នៅព្រឹកថ្ងៃពុធ ទី២០ ខែមីនាថា មូលហេតុនាំឲ្យមានការយឺតយ៉ាវ ក្នុងការអភិវឌ្ឍន៍តំបន់ប្រវត្តិសាស្ត្រដើមពោធិ៍ទុំទាវ ក៏ព្រោះតែការស្ថាបនាផ្លូវចូលទៅកាន់តំបន់ប្រវត្តិសាស្ត្រនេះ បានប៉ះពាល់ដល់លំនៅដ្ឋាន របស់ប្រជាពលរដ្ឋមួយគ្រួសារ។ ប៉ុន្តែបច្ចុប្បន្ននេះ លោក ជាម ច័ន្ទសោភ័ណ អភិបាលខេត្តត្បូងឃ្មុំ បានចាត់មន្ត្រីជំនាញ ឲ្យចុះសម្របសម្រួលជាមួយ ប្រជាពលរដ្ឋ ដែលមានផលប៉ះពាល់ នោះរួចហើយៗ នឹងជម្រុញការអភិវឌ្ឍន៍ផ្លូវនៅតំបន់ខាងលើនេះ ឲ្យបានរួចរាល់នៅមុនពិធីបុណ្យចូលឆ្នាំថ្មីចូលមកដល់។
យ៉ាងណា លោក គួ ហុក ទទួលស្គាល់ថា សប្តាហ៍កន្លងមកនេះ ពិតជាមានប្រជាពលរដ្ឋ រស់នៅមូលដ្ឋានខាងលើ បានរួមគ្នាសង់ទីសក្ការៈ សម្រាប់គោរពបូជា នៅលើទីតាំងប្រវត្តិសាស្ត្រដើមពោធិ៍ទុំទាវ ពិតមែន។ ហើយរូបលោក បានគាំទ្រចំពោះសកម្មភាព របស់ប្រជាពលរដ្ឋ និងបានចូលរួមជាថវិកាខ្លះ ដើម្បីចំណាយទៅលើការងារស្ថាបនាទីសក្ការៈគោរពបូជានេះផងដែរ។
លោកទទួលស្គាល់ថា ការយឺតយ៉ាវ លើការងារអភិវឌ្ឍន៍តំបន់ប្រវត្តិសាស្ត្រខាងលើនេះ ក៏ព្រោះតែគម្រោងស្ថាបនាទីសក្ការៈខាងលើ បានប៉ះពាល់ដល់ដីកម្មសិទ្ធិ របស់ប្រជាពលរដ្ឋ នៅជុំវិញតំបន់នោះ។ ប៉ុន្តែបច្ចុប្បន្ននេះ ប្រជាពលរដ្ឋ ក្នុងមូលដ្ឋាន បានរួមគ្នាកសាងទីសក្ការៈ សម្រាប់គោរពបូជា នៅលើទីតាំងប្រវត្តិសាស្ត្រនេះ ដោយខ្លួនឯង ដោយគ្រោងស្ថាបនា ឲ្យរួចរាល់នៅមុនពិធីបុណ្យចូលឆ្នាំថ្មី ឆ្នាំនេះ។
ទោះជាបែបនេះក្តី ប្រជាពលរដ្ឋ ថ្លែងថា ដោយពួកគាត់អស់ជំនឿ ទៅលើការសន្យា របស់ថ្នាក់ដឹកនាំរដ្ឋបាលខេត្តត្បូងឃ្មុំ និងមន្ទីរវប្បធម៌ និងវិចិត្រសិល្បៈខេត្តនេះ ទើបពួកគាត់ បានរួមសហការគ្នារៃអង្គាសលុយ ដើម្បីស្ថាបនា ផ្លូវលំ និងកសាងទីសក្ការៈសម្រាប់គោរពបូជា នៅតំបន់ប្រវត្តិសាស្ត្រខាងលើដោយខ្លួន។ ខណៈការទន្ទឹងរង់ចាំ ការចុះមកអភិវឌ្ឍន៍តំបន់ប្រវត្តិសាស្ត្រដើមពោធិ៍ទុំទាវ របស់រដ្ឋបាលខេត្តត្បូងឃ្មុំ និងមន្ទីរវប្បធម៌ និងវិចិត្រសិល្បៈ បានអូសបន្លាយពេលរាប់ឆ្នាំ។
ពលរដ្ឋបន្តទៀតថា កន្លងមក មានស្ត្រីវ័យចំណាស់ម្នាក់ បានចូលលុយ ឬចូលជាបច្ច័យជូន លោក គួ ហុក ប្រធានមន្ទីរវប្បធម៌ និងវិចិត្រសិល្បៈ ខេត្តត្បូងឃ្មុំ ចំនួន ២០លានរៀល ដើម្បីកសាងទីសក្ការៈគោរពបូជា នៅលើទីតាំងបំបន់ប្រវត្តិសាស្ត្រដើមពោធិ៍ទុំទាវនេះ ប៉ុន្តែបែរជា មិនដែលឃើញមន្ត្រីស្ថាប័នខាងលើ ចុះទៅកសាងអ្វីបន្តិចនោះទេ គឺបានត្រឹមលើកយកហេតុផលផ្សេងៗ មកដោះស្រាយ ពេលពលរដ្ឋ ឬអ្នកសារព័ត៌មាន សួរនាំរឿងនេះ។
ឆ្លើយតបលុយចំនួន ២០លានរៀល ដែលស្ត្រីចំណាស់ម្នាក់ បានផ្តល់សម្រាប់កសាងទីសក្ការៈបូជា នៅតំបន់ប្រវត្តិសាស្ត្រដើមពោធិ៍ទុំទាវខាងលើនេះ ត្រូវបាន លោក គួ ហុក ប្រធានមន្ទីរវប្បធម៌ និងវិចិត្រសិល្បៈ ខេត្តត្បូងឃ្មុំ បំភ្លឺថា រូបគាត់បានប្រគល់លុយ ២០លានរៀលនោះ ត្រឡប់ទៅម្ចាស់ដើមគេវិញហើយ។ លោកបន្តថា មូលហេតុ រូបលោក ប្រគល់លុយ ២០លានរៀល ទៅឲ្យម្ចាស់លុយគេវិញ ក៏ព្រោះតែគម្រោងកសាងទីសក្ការៈ នៅតំបន់ប្រវត្តិសាស្ត្រដើមពោធិ៍ទុំទាវនេះ បានប៉ះពាលដីធ្លី របស់ប្រជាពលរដ្ឋ ដែលមានរបង ឬព្រំជាប់គ្នា ហើយមិនទាន់ដោះស្រាយរួចនៅឡើយ។
ទោះជាបែបនេះក្តី ស្ត្រីវ័យចំណាស់ម្នាក់ ដែលគេស្គាល់ឈ្មោះ លោកយាយ ញ៉ ជាម្ចាស់លុយ ២០លានរៀល ដែលបានប្រគល់ជូន លោក គួ ហុក ប្រធានមន្ទីរវប្បធម៌ និងវិចិត្រសិល្បៈ ខេត្តត្បូងឃ្មុំ បានប្រាប់អ្នកសារព័ត៌មានថា រូបគាត់មិនបានទទួលយកលុយ ២០លានរៀល ដែលបានប្រគល់ជូនអាជ្ញាធរនោះ មកវិញទេ។ ព្រោះលុយនេះ រូបគាត់បានផ្តល់ជូនទុកកសាងទីសក្ការៈគោរពបូជា នៅលើទីតាំងប្រវត្តិសាស្ត្រដើមពោធិ៍ទុំទាវ ដើម្បីទុកឲ្យប្រជាពលរដ្ឋ ឬកូនចៅជំនាន់ក្រោយ ធ្វើបុណ្យតាមប្រពៃណី ជំនឿពីដូនតា និងទុកសម្រាប់ភ្ញៀវទេសចរជាតិ-អន្តរជាតិ ដែលចង់ឃើញតំបន់ប្រវត្តិសាស្ត្រមួយនេះ នាថ្ងៃអនាគត៕ ដែន សីមា
