ខេត្ត្ព្រះសីហនុ ៖ គ្រោះថ្នាក់ចរាចរណ៍ បានស្លាប់មនុស្សស្ទើរជារៀងរាល់យប់ថ្ងៃ នៅតាមផ្លូវនានា នៅក្នុងមូលដ្ឋានខេត្តព្រះសីហនុ ដោយមិនគិតថា តាមផ្លូវល្បឿនលឿន ផ្លូវជាតិលេខ៤ ផ្លូវលំ ផ្លូវដី ឬផ្លូវគ្រួសក្រមហម នោះទេ។
ត្រង់ចំណុចនេះ មន្ត្រីនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ បានក្រើនរំលឹកម្តងហើយម្តងទៀត ទៅដល់អ្នកប្រើប្រាស់ផ្លូវ ឬអ្នកបើកបរយានជំនិះគ្រប់ប្រភេទ ត្រូវចូលរួមអនុវត្តច្បាប់ចរាចរណ៍ ឲ្យបានទាំងអស់គ្នា ប្រយោជន៍ដើម្បីឈានទៅកាន់បន្ថយ អត្រាគ្រោះថ្នាក់ចរាចរណ៍ ក៏ដូចជាអត្រារងរបួស និងស្លាប់ ដោយគ្រោះថ្នាក់នេះ ឲ្យថយចុះចំនួននាថ្ងៃអនាគត។
មន្ត្រីជំនាញ បញ្ជាក់ថា អត្រាគ្រោះថ្នាក់ចរាចរណ៍ ដែលកើតឡើងតាមផ្លូវរាល់ថ្ងៃនេះ គឺភាគច្រើនកើតឡើង ដោយកត្តាមនុស្ស បើកវ៉ាជែងក្នុងស្ថានភាពផ្លូវគ្រោះថ្នាក់ បើកបរក្នុងល្បឿនលឿន មិនគោរពស្លាកសញ្ញា ឬភ្លើងបញ្ជាចរាចរណ៍ បើកបរគ្មានការយោគយល់ ធ្វេសប្រហែស និងអ្នកបើកបរស្រវឹងជាដើម។
ជាក់ស្តែង កាលពីម៉ោង ០៨ព្រឹកថ្ងៃទី២៣ ខែកុម្ភៈនេះ មានករណី បងប្អូនបង្កើតពីរនាក់ បានបើកម៉ូតូបុកប៉ះគ្នា នៅតាមផ្លូវលំមួយកន្លែង ស្ថិតក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ បណ្តាលឲ្យស្លាប់មនុស្សម្នាក់ និងរងរបួសបីនាក់។
សមត្ថកិច្ចនគរបាល ស្រុកព្រៃនប់ បានឲ្យដឹងថា ជនរងគ្រោះ ក្នុងគ្រោះថ្នាក់ចរាចរណ៍នេះមានឈ្មោះ៖
១- ឈ្មោះ សោ សុខា ភេទប្រុស អ្នកបេីកបរម៉ូតូ HONDA DREAM (ស្លាប់នៅកន្លែងកើតហេតុ)
២- ឈ្មោះ សោ ម៉ាប់ ភេទប្រុស អ្នកបើកបរម៉ូតូ HONDA WAVE (រងរបួសស្រាល)
៣- ឈ្មោះ ឈឿន ហ៊ាង ភេទស្រី អ្នករួដំណើរម៉ូតូ HONDA WAVE (រងរបួសស្រាល)
៤- ឈ្មោះ ទើន ចាន់សីហា ភេទប្រុស អ្នករួមដំណើរម៉ូតូ HONDA WAVE (រងរបួសស្រាល)
បច្ចុប្បន្ន សាកសព របស់ជនរងគ្រោះ ត្រូវបានក្រុមគ្រួសារ នាំយកទៅធ្វើបុណ្យប្រពៃណី។ ចំណែក វត្ថុតាង (ម៉ូតូ) ត្រូវបានកម្លាំងសមត្ថកិច្ច នាំយកមករក្សាទុកជាបណ្តោះអាសន្ន នៅអធិការដ្ឋាននគរបាលស្រុកព្រៃនប់ ដើម្បីរង់ចាំរកដំណោះស្រាយនៅពេលក្រោយ។
សមត្ថកិច្ច បញ្ជាក់ថា ករណីគ្រោះថ្នាក់ចរាចរណ៍ខាងលើនេះ អ្នកបើកបរម៉ូតូទាំង ០២គ្រឿង គឺជាបងប្អូនបង្កើតជាមួយគ្នា៕