សាលាដំបូងខេត្តព្រះសីហនុ ចេញដីកាឃុំខ្លួន ជនត្រូវចោទ ដេវីដ ឆាណាយវ៉ា ពីបទញុះញង់
ខេត្តព្រះសីហនុ ៖ សាលាដំបូង ខេត្តព្រះសីហនុ បានចេញដីកា បង្គាប់ឲ្យឃុំខ្លួន ជនត្រូវចោទ ដេវីដ ឆាណាយវ៉ា ហៅក្រៅ «កូនមានវាសនា» ភេទប្រុស អាយុ ៥១ឆ្នាំ (កើតនៅថ្ងៃទី២ ខែកុម្ភៈ ឆ្នាំ១៩៧២) ជនជាតិខ្មែរ មុខរបរជា សារព័ត៌មាន ទីកន្លែងកំណើត សង្កាត់លេខ៥ ភ្នំពេញ មានទីលំនៅមុនពេលឃាត់ខ្លួន ផ្ទះលេខ១២៦អឺ២ ក្នុងសង្កាត់បឹងកេងកងទី១ ខណ្ឌចំការមន រាជធានីភ្នំពេញ ។
ដីកាដដែល បានបញ្ជាក់ថា ជនត្រូវចោទ ត្រូវបានដាក់ឱ្យស្ថិត នៅក្រោមការពិនិត្យពីបទញុះញង់ ឱ្យប្រព្រឹត្តបទឧក្រិដ្ឋជាអាទិ៍ និងបទប្រព្រឹត្តបទបរិហាកេរ្តិ៍ ជាសាធារណៈ ប្រព្រឹត្តនៅចំណុច ភូមិចំណោតរាម ឃុំចំណោតរាម ស្រុកព្រៃនប់ ខេត្តព្រះសីហនុ កាលពីអំឡុងខែមីនា ដល់ខែមេសា ឆ្នាំ២០២៣ បទល្មើស ដែលមានចែង ឱ្យផ្តន្ទាទោស តាមបញ្ញត្តិមាត្រា៤៩៤, មាត្រា៤៩៥ និងមាត្រា ៣០៥ នៃក្រមព្រហ្មទណ្ឌ៕
