អ្នកឧកញ៉ា ទៀ វិចិត្រ បន្តជួយសង្គ្រោះជីវិត អ្នកនេសាទពីរនាក់ លិចទូកកណ្តាលសមុទ្រ
ខេត្តព្រះសីហនុ ៖ ក្រុមគ្រួសារ និងជនរងគ្រោះ បុរសអ្នកនេសាទពីរនាក់ បានថ្លែងអំណរគុណ ចំពោះទឹកចិត្តសប្បុរសធម៌ របស់អ្នកឧកញ៉ាទៀ វិចិត្រ និងក្រុមការងារ របស់ក្រុមហ៊ុន ជី.ធី.វី.ស៊ី ( G.T.V.C ) ទាំងអស់ ដែលបានជួយសង្គ្រោះពួកគាត់ពីការលិចទូក នៅលើលម្ហសមុទ្រ នៅពេលយប់ បណ្តាលមកពីភ្លៀងធ្លាក់ខ្លាំង ខ្យល់ព្យុះបោកបក់ និងរលកសមុទ្រធំៗ។
ស្ត្រីម្នាក់ ដែលជាគ្រួសារជនរងគ្រោះ បានថ្លែងទាំងទឹកភ្នែក ជាមួយលើកដៃទាំងពីរសំពះ អរគុណដល់ ទឹកចិត្តសប្បុរសធម៌ ក៏ដូចជាការជួយយកចិត្តទុកដាក់ របស់អ្នកឧកញ៉ា ទៀ វិចិត្រ និងក្រុមការងារ ដែលបានជួយសង្គ្រោះ សាច់ញាតិ របស់គាត់ ទាន់ពេលវេលា ខណៈរូបគាត់ស្ទើរមិនជឿថា នឹងអាចមានជីវិតរស់នៅលើផែនដីនេះវិញទេ។
សូមបញ្ជាក់ថា អ្នកឧកញ៉ា ទៀ វិចិត្រ ប្រធានក្រុមហ៊ុន ជី.ធី.វី.ស៊ី ( G.T.V.C ) បានបញ្ជូនអូរប័រល្បឿនលឿន ឳ្យចុះល្បាត នៅលើលម្ហសមុទ្រ ខេត្តព្រះសីហនុ ដើម្បីស្វែងរក និងជួយសង្គ្រោះ បុរសអ្នកនេសាទ ចំនួន ២នាក់ ដែលទូក របស់គាត់ ត្រូវខ្យល់ព្យុះ រលកសមុទ្របោកបក់ លិចនៅកណ្តាលសមុទ្រ ម្តុំខាងជើងកោះថាស នៅម៉ោងជាង ៨យប់ ថ្ងៃទី១៨ ខែកក្កដា ឆ្នាំ២០២៤។
បុរសរងគ្រោះទាំងពីរនាក់ មាន ឈ្មោះ ឃឹម ហូវ ភេទប្រុស អាយុ ៤៥ឆ្នាំ ជាម្ចាស់ទូក និងឈ្មោះ ផេន វុទ្ធី ភេទប្រុស អាយុ ២៦ឆ្នាំ មុខរបរកូនដៃទូក ។ ហើយ អ្នកទាំង ២ ស្នាក់នៅទំនប់រលក ស្ថិតនៅភូមិ៣ សង្កាត់៣ ក្រុង-ខេត្តព្រះសីហនុ។
បុរសរងគ្រោះទាំង ពីរនាក់ ត្រូវបានក្រុមការងារអូបរ័ល្បឿនលឿន របស់ អ្នកឧកញ៉ា ទៀ វិចិត្រ ស្វែងរកឃើញ និងបានជួយសង្គ្រោះ រួចផុតពីគ្រោះថ្នាក់ដល់អាយុជីវិត រួចដឹកមកកាន់កំពង់ផែក្រុងព្រះសីហនុ ដោយសុរវត្ថិភាព។
ជនរងគ្រោះ បានឳ្យដឹងថា ទូកនេសាទ របស់គាត់ បានលិចពេលមានភ្លៀងខ្លាំង ខ្យល់ព្យុះបោកបក់ និងរលកសមុទ្រខ្លាំង ។ ហើយក្រោយទូក ក៏បានលិច ដោយពួកគាត់ បានតោងប៊ីដុងជ័រ ហែលបណ្តែតខ្លួន នៅលើទឹកសមុទ្រ ជិតមួយម៉ោង។ ទើបសំណាងល្អ បានក្រុមការងារសង្គ្រោះ របស់ អ្នកឧកញ៉ា ទៀ វិចិត្រ ស្វែងរកឃើញ និងជួយសង្គ្រោះ ទាំងក្នុងពេលនៅលើលម្ហសមុទ្រ កំពុងមានភ្លៀងធ្លាក់ខ្លាំង ខ្យល់បោកបក់ និងរលកធំៗផង។
បច្ចុប្បន្ន ជនរងគ្រោះទាំង២នាក់ ត្រូវបានក្រុមការងារ របស់អ្នកឧកញ៉ា ទៀ វិចិត្រ បាននាំយកមកដីគោក នៅកំពង់ផែទេសចរណ៍ ដោយសុវត្ថិភាព៕
