សមត្ថកិច្ចចម្រុះខេត្តរតនគិរី ចាប់ខ្លួនជនជាតិវៀតណាម២៦នាក់ លួចជីករ៉ែមាស នៅតំបន់កន្ទុយនាគ
ខេត្តរតនគិរី ៖ កម្លាំងសមត្ថកិច្ចចម្រុះ បានចុះឃាត់ខ្លួន ជនជាតិវៀតណាម មួយក្រុមមានគ្នា ២៦នាក់ ចូលលួចជីករ៉ែមាស ដោយខុសច្បាប់ នៅតំបន់កន្ទុយនាគ ដែលលាតសន្ធឹងក្នុងស្រុកអណ្តូងមាស និងស្រុកតាវែង។
ប្រតិបត្តិការនោះ កម្លាំងចម្រុះខេត្តរតនគិរី បានបង្ក្រាបនិងឃាត់ខ្លួនរួមទាំងសម្ភារៈជាឧបករណ៍ និងគ្រឿងចក្រអេស្កាវ៉ាទ័រ ជាច្រើនគ្រឿង ផងដែរ។
ប្រតិបត្តិការ ដឹកនាំដោយ លោក ម៉ា វិចិត្រ អភិបាលរងខេត្ដរតនគិរី និងសម្របសម្រួលនីតិវិធីដោយ ព្រះរាជអាជ្ញារង អមសាលាដំបូងខេត្តរតនគិរី កាលពីថ្ងៃទី៧ ខែមីនា ឆ្នាំ២០២៤។
កម្លាំងប្រដាប់អាវុធទាំង ៣ប្រភេទ រួមមានមន្ត្រីឧទ្យានជាតិ មន្ត្រីរ៉ែ និងថាមពលខេត្ត មន្ត្រីខណ្ឌរដ្ឋបាលព្រៃឈើខេត្ត អភិបាលស្រុកតាវែង និងមន្ត្រីពាក់ព័ន្ធមួយចំនួនទៀត ក៏បានចូលរួមដែរ ដោយប្រើរយៈពេល ៣ថ្ងៃ គិតត្រឹមថ្ងៃទី៧ ដល់ទី១០ ខែមីនា ទើបប្រតិបត្តិការនេះ បានបញ្ចប់ដោយជោគជ័យ។
បច្ចុប្បន្ន ជនជាតិវៀតណាមទាំង ២៦នាក់ ដែលត្រូវបានកម្លាំងចម្រុះចាប់ខ្លួន បាននាំយកទៅកាន់អធិការដ្ឋាននគរបាលស្រុកអណ្ដូងមាស ជាបណ្តោះអាសន្ន ដើម្បីសាកសួរ និងឈានទៅកសាងសំណុំរឿង បញ្ជូនទៅកាន់សាលាដំបូងខេត្តរតនគិរី បន្តនីតិវិធី។
ចំណែក គ្រឿងចក្រអេស្កាវ៉ាទ័រ ចំនួន៤គ្រឿង ដែលបម្រើឲ្យជាមធ្យោបាយប្រព្រឹត្តបទល្មើស ជីកយករ៉ែមាស ខុសច្បាប់ បានរក្សាទុកនៅនឹងកន្លែងកើតហេតុ ដដែលសិន។
ទាក់ទិនបញ្ហានេះ មន្ត្រីជំនាញស្ថាប័នពាក់ព័ន្ធមួយចំនួន បានបដិសេធន៍មិនបំភ្លឺជុំវិញការឃាត់ខ្លួនជនអន្តោប្រវេសន៍វៀតណាម ខុសច្បាប់ទាំង២៦នាក់ខាងលើទេ ដោយគ្រាន់តែបញ្ជាក់ខ្លីថា កំពុងបន្តស្រាវជ្រាវ។ ហើយគិតត្រឹមថ្ងៃទី១២ ខែមីនា ឆ្នាំ២០២៤នេះ មិនទាន់មានការប្រកាសព័ត៌មានណាមួយពូ ក្រសួងរ៉ែ និងថាមពល នៅឡើយទេ ទាក់ទងករណីខាងលើនេះ៕ ប្រភព fb : Reth Mony
