អ្នកសារព័ត៌មាន MSJ TV ប្រចាំខេត្តព្រះសីហនុ បន្តប្តឹងទៅតុលាការកំពូល លើសំណុំរឿងឈ្មួញដី ប្រើអំពើហិង្សា និងបំផ្លាញសម្ភារៈ
ខេត្តព្រះសីហនុ ៖ អ្នកយកព័ត៌មានម្នាក់ បំរើការងារឲ្យទូរទស្សន៍អនឡាញ អឹម អេស ជេ ធីវី (MSJ TV) ប្រចាំខេត្តព្រះសីហនុ បានបន្តដាក់ពាក្យបណ្តឹងទៅកាន់តុលាការកំពូល ដើម្បីជួយរកយុត្តិធ៌មជាបន្តទៀត ខណៈការជម្រះក្តី និងការប្រកាសសាលាក្រម របស់សាលាឧទ្ទណ៍ ខេត្តព្រះសីហនុ នាំឱ្យរូបគាត់ខកចិត្ត និងគ្មានយុត្តិធម៌សម្រាប់រូបលោក។ សំណុំរឿងនេះ ជនរងគ្រោះ ក៏ស្នើដល់ប្រមុខដឹកនាំរាជរដ្ឋាភិបាល និងរដ្ឋមន្ត្រីក្រសួងយុត្តិធម៌ ជួយអន្តរាគមន៍ផ្តល់យុត្តិធម៌ផងដែរ។
លោក ដួង ច័ន្ទបូរិទ្ធ អ្នកយកព័ត៌មានទូរទស្សន៍អនឡាញ អឹម អេស ជេ បានចាត់ទុក សាលក្រម របស់សាលាឧទ្ធរណ៍ខេត្តព្រះសីហនុ ដែលបានបើកអង្គជំនុំជម្រះកំបាំងមុខ លើសំណុំរឿងព្រហ្មទណ្ឌលេខ៤២៥ ដែលមានរូបលោកជាជនរងគ្រោះ គឺគ្មានភាពយុត្តិធម៌ និងមិនអាចទទួលយកបានឡើយ។ ហើយថា ករណីនេះ រូបលោក ក៏បានសម្រេចដាក់ពាក្យបណ្តឹងបន្ត ទៅកាន់តុលាការកំពូល កាលពីថ្ងៃទី១៦ ខែកុម្ភៈ ឆ្នាំ២០២៤ ដើម្បីឱ្យជួយរកយុត្តិធម៌ជាបន្តទៀត។
ទន្ទឹមគ្នានេះ លោក ដួង ច័ន្ទបូរិទ្ធ ក៏បានសំណូមពរដល់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោក កើត រិទ្ធ រដ្ឋមន្ត្រីក្រសួងយុត្តិធម៌ ជួយអន្តរាគមន៍លើសំណុំរឿង របស់លោកផងដែរ។
លោក ដួង ច័ន្ទបូរិទ្ធ ផ្តល់សម្ភាសន៍ឱ្យគេហទំព័រ «កម្ពុជាថ្ងៃនេះ» ដឹងនៅថ្ងៃព្រហស្បត្តិ៍ ទី២២ ខែកុម្ភៈ ឆ្នាំ២០២៤នេះថា សំណុំរឿងព្រហ្មទណ្ឌលេខ៤២៥ របស់លោក គឺត្រូវបានសាលាឧទ្ធរណ៍ លើកយកជំនុំជម្រះដោយកំបាំងមុខ និងមិនបានជូនដំណឹងដល់រូបលោក ជាដើមបណ្តឹង និងជាជនរងគ្រោះទេ។
លោកបន្តថា អំពើហិង្សានេះ បានកើតឡើងកាលពីថ្ងៃទី២១ ខែកុម្ភៈ ឆ្នាំ២០២០ វេលាម៉ោង ៤និង៣០នាទីល្ងាច នៅភូមិ៥ ឃុំអូត្រេះ ស្រុកស្ទឹងហាវ បច្ចុប្បន្នស្ថិតក្នុងភូមិ៣ សង្កាត់១ ក្រុងព្រះសីហនុ ប្រព្រឹត្តដោយស្ត្រីឈ្មួញរកស៊ីដី ឈ្មោះ ជា សុខឡេង និងកូនប្រុសឈ្មោះ គឹម រដ្ឋធី ដោយបានប្រើហិង្សា និងបោកបំផ្លាញសម្ភារៈ របស់ លោកក្នុងអំឡុងពេល ចុះយកព័ត៌មានទាក់ទងវិវាទដីធ្លី នៅតំបន់នោះ។
លោក ដួង ច័ន្ទបូរិទ្ធ បានឱ្យដឹងបន្តទៀតថា ក្រោយកើតហេតុ រូបលោកបានទៅដាក់ពាក្យបណ្ដឹង នៅស្នងការដ្ឋាននគរបាលខេត្តសីហនុ ហើយសំណុំរឿងនេះ ក៏ត្រូវបានបញ្ជូនទៅកាន់ សាលាដំបូងខេត្តព្រះសីហនុ កាលពីថ្ងៃទី១១ ខែសីហា។ ហើយក្រោយមក ក៏ត្រូវសាលាដំបូង លើកយកមកជំនុំជម្រះ នៅថ្ងៃទី២៤ ខែវិច្ឆិកា ឆ្នាំ២០២០ ដោយសាលាដំបូងខេត្តព្រះសីហនុ សម្រេចឲ្យភាគីជនបង្ក ឈ្មោះ ជា សុខឡេង សងជំងឺចិត្ត ដល់រូបលោកជាជនរងគ្រោះ ជាទឹកប្រាក់ចំនួន ១លានរៀល ប៉ុន្តែដោយសារតែរូបលោក មិនពេញចិត្តចំពោះការសម្រេចអង្គសេចក្តី របស់សាលាដំបូងខេត្តព្រះសីហនុ ក៏បានដាក់បណ្តឹងសាលាឧទ្ធរណ៍ ឱ្យជួយរកយុត្តិធម៌បន្តទៀត។
យោងតាមសាលក្រម របស់សាលាដំបូងខេត្តព្រះសីហនុ មានខ្លឹមសារ ក្នុងសេចក្តីសម្រេចថា៖
១- ផ្តន្ទាទោសលើ ជនជាប់ចោទឈ្មោះ ជា សុខឡេង ភេទស្រី (មានសាវតាជាតិដូចខាងលើ) ដាក់ទោសពិន័យជាប្រាក់ចំនួន ១០០.០០០ (មួយសែន) រៀល ពីបទ៖ «ហិង្សាស្រាល» ប្រព្រឹត្តនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ កាលពីថ្ងៃទី២១ ខែកុម្ភៈ ឆ្នាំ២០២០ បទល្មើសព្រហ្មទណ្ឌដែលមានចែងឲ្យផ្ដន្ទាទោស តាមបញ្ញត្តិមាត្រា ២២៨ នៃក្រមព្រហ្មទណ្ឌ ។
២- បង្គាប់ឲ្យឈ្មោះ ជា សុខឡេង សងសំណងចំនួន ១.០០០.០០០ (មួយលាន) រៀល ទៅឲ្យដើមបណ្ដឹងរដ្ឋប្បវេណីឈ្មោះ ដួង ចន្ទ័បូរិទ្ធ។ ការទាមទារលើសពីនេះត្រូវច្រានចោល។
សាលក្រមនេះ បានជំនុំជម្រះជាសាធារណៈ នៅថ្ងៃទី០៣ ខែវិច្ឆិកា ឆ្នាំ២០២០ និងប្រកាសជាសាធារណៈ នៅថ្ងៃទី២៤ ខែវិច្ឆិកា ឆ្នាំ២០២០ ចំពោះមុខដើមបណ្តឹងរដ្ឋប្បវេណី កំបាំងមុខជនជាប់ចោទ ទុកសិទ្ធិប្ដឹងទាស់ និងប្តឹងឧទ្ធរណ៍តាមកំណត់ច្បាប់។
លោក ដួង ច័ន្ទបូរិទ្ធ បញ្ជាក់បន្ថែមថា ក្រោយពីបានដាក់ពាក្យប្តឹងសុំអន្តរគមន៍ ទៅរដ្ឋមន្ត្រីក្រសួងយុត្តិធម៌ ដើម្បីជួយអន្តរាគមន៍បន្តដល់រូបគាត់។ ទើបនៅថ្ងៃទី០១ ខែកុម្ភៈ ឆ្នាំ២០២៤ លោកបានទៅកាន់សាលាឧទ្ធរណ៍ ខេត្តព្រះសីហនុ ដើម្បីជួបក្រឡាបញ្ជីឈ្មោះ ណូត ណាវុន ដើម្បីសួរនាំលើសំណុំរឿង របស់លោក ហើយត្រូវបានលោកក្រឡាបញ្ជីរូបនេះ បញ្ជាក់ថា សំណុំរឿងរបស់លោក បានចេញសាលដីកា តាំងពីថ្ងៃទី១៨ ខែមករា ឆ្នាំ២០២២ មកម៉្លេះ។
ត្រង់ចំណុចនេះ លោក ដួង ច័ន្ទបូរិទ្ធ បានបង្ហាញអារម្មណ៍ហួសចិត្ត និងលើកជាចម្ងល់ថា ហេតុអ្វី សំណុំរឿង ដែលដាក់ប្ដឹងមកសាលាឧទ្ធរណ៍តាំងពីឆ្នាំ២០២០ រហូតមកដល់ឆ្នាំ២០២៤ មិនធ្លាប់មានមន្ត្រីបំរើការងារ នៅសាលាឧទ្ធរណ៍ ហៅ ឬក៏ផ្ដល់ព័ត៌មានមករូបលោកម្តងណាទេ? វាជារឿងអយុត្តិធម៌ពេកហើយ..?
លោកបន្តថា ក្រោយមក លោក ណូត ណាវុន ក្រឡាបញ្ជី សាលាឧទ្ទរណ៍ ក៏បានប្រគល់សាលដីកា ជូនមករូបលោក និងបានទុកសិទ្ធិ ឲ្យប្ដឹងឡើងទៅតុលាការកំពូលជាបន្តទៀត។
គួររំលឹកថា សវនាការសាលាឧទ្ធរណ៍ខេត្តព្រះសីហនុ ប្រធានក្រុមប្រឹក្សាជំនុំជម្រះ បានលើកយកទម្រង់បណ្ដឹងឧទ្ធរណ៍មកបញ្ជាក់ថា តំណាងមហាអយ្យការធ្វើសេចក្តីសន្និដ្ឋាន «ក្នុងរឿងនេះ ដើមបណ្ដឹង បានប្ដឹងឧទ្ធរណ៍លើសាលក្រមទាំងមូល គឺពុំមានលក្ខណៈត្រឹមត្រូវនោះទេ ដោយសារតែដើមបណ្តឹងរដ្ឋប្បវេណី មានសិទ្ធិប្ដឹងឧទ្ធរណ៍តែនៅលើសំណងរដ្ឋប្បវេណីតែប៉ុណ្ណោះ»។
សាលក្រមសាលាឧទ្ធរណ៍ខេត្តព្រះសីហនុ បានបញ្ជាក់ថា សំអាងហេតុបណ្ដឹងឧទ្ធរណ៍លេខ ១៨១ ចុះថ្ងៃទី២៤ ខែវិច្ឆិកា ឆ្នាំ២០២០ របស់ដើមបណ្តឹងរដ្ឋប្បវេណី ឈ្មោះ ដួង ចន្ទ័បូរិទ្ធ ប្តឹងឧទ្ធរណ៍ នឹងសាលក្រមលេខ ១១៤៥/១៤៥-ខ” ចុះថ្ងៃទី ២៤ ខែវិច្ឆិកា ឆ្នាំ ២០២០ របស់សាលាដំបូងខេត្តព្រះសីហនុ ត្រង់ចំណុចទាំងមូល នៃសេចក្តីសម្រេច បានធ្វើនៅក្នុងលក្ខខណ្ឌមិនត្រឹមត្រូវនោះទេ (ខុសទម្រង់ច្បាប់) សភាព្រហ្មទណ្ឌ គប្បីប្រកាសថា បណ្ដឹងឧទ្ធរណ៍ មិនអាចទទួលយកបាន យោងតាមមាត្រា ៤០៤ នៃក្រមនីតិ វិធីព្រហ្មទណ្ឌ។
ហេតុដូច្នេះ វិនិច្ឆយ័សេចក្តី៖ ១-ប្រកាសថាបណ្ដឹងឧទ្ធរណ៍លេខ ១៨១ ចុះថ្ងៃទី២៤ ខែវិច្ឆិកា ឆ្នាំ២០២០ របស់ឈ្មោះ ដួង ច័ន្ទបូរិទ្ធ ជាបណ្តឹងរដ្ឋប្បវេណី មិនអាចទទួលយកបាន។
២-សាលដីកានេះ ជំនុំជម្រះជាសាធារណៈ នាថ្ងៃទី១២ ខែមករា ឆ្នាំ២០២២ និងប្រកាសជាសាធារណៈ នៅសាលសវនាការ នៃសាលាឧទ្ធរណ៍ព្រះសីហនុ នាថ្ងៃអង្គារ ១រោច ខែបុស្ស ឆ្នាំឆ្លូវ ត្រីស័ក ព.ស ២៥៦៥ ត្រូវ នឹងថ្ងៃទី១៨ ខែមករា ឆ្នាំ២០២២។
យ៉ាងណាក៏ដោយចុះ លោក ដួង ច័ន្ទបូរិទ្ធ អ្នកយកព័ត៌មានឲ្យទូរទស្សន៍អនឡាញ អឹម អេស ជេ ធីវី (MSJ TV) ប្រចាំខេត្តព្រះសីហនុ ក៏បានសំណូមពរដល់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោក កើត រិទ្ធ រដ្ឋមន្ត្រីក្រសួងយុត្តិធម៌ ស្នើជួយពន្លឿនដោះស្រាយ និងរកយុត្តិធម៌ ជូនរូបលោកដោយក្តីអនុគ្រោះផងចុះ៕
