សមត្ថកិច្ចក្រុងព្រះសីហនុ ឃាត់សិស្សសាលាមួយក្រុម គេចមិនចូលរៀន នៅថ្ងៃទិវានៃក្តីស្រលាញ់ មកអប់រំ
ខេត្តព្រះសីហនុ ៖ កម្លាំងនគរបាលក្រុងព្រះសីហនុ សហការជាមួយ កម្លាំងកងរាជអាវុធហត្ថ និងអាជ្ញាធរមូលដ្ឋាន នៅព្រឹកថ្ងៃទី១៤ ខែកុម្ភៈ ឆ្នាំ២០២៤នេះ បានចុះឃ្លាំមើលសកម្មភាព របស់សិស្សសាលា ហើយបានឃាត់ខ្លួនយុវជនសិស្សសាលាមួយចំនួន នាំយកមកអប់រំ។
លោកវរសេនីយ៍ឯក តី វិសាល អធិការនគរបាលក្រុងព្រះសីហនុ បានឲ្យដឹងថា យុវជនសិស្សសាលា ដែលកម្លាំងសមត្ថកិច្ចឃាត់ខ្លួន នាំយកមកអប់រំខាងលើ ដោយសារតែពួកគេ នាំគ្នាមកកន្លែងកម្សាន្តមួយកន្លែង នៅត្រង់ចំណុចម្តុំអូរស្តេចមឹក ស្ថិតក្នុងសង្កាត់លេខ៤ ក្រុងព្រះសីហនុ ដោយមិនចូលសាលារៀន។ ក្នុងនោះស្ត្រីមួយរូប ដែលជាម្ចាស់ទីតាំង ក៏ត្រូវបានឃាត់ខ្លួនបណ្តោះអាសន្ន នាំយកមកសាកសួរតាមនីតិវិធីផងដែរ។
លោកអធិការបន្តថា សិស្សសាលាដែលសមត្ថកិច្ចឃាត់ខ្លួនទាំងអស់ ត្រូវសមត្ថកិច្ចតម្រូវឲ្យធ្វើកិច្ចសន្យា រួចអញ្ចើញអាណាព្យាបាល របស់ពួកគេ ឲ្យមកធានា មុននឹងអនុញ្ញាតឲ្យវិលត្រឡប់ ទៅផ្ទះរៀងៗខ្លួនវិញ៕ (រូបថតទទួលពីសមត្ថកិច្ច)
