ពលរដ្ឋខេត្តព្រះសីហនុ អបអរសាទរ សម្តេចធិបតី ហ៊ុន ម៉ណែត បញ្ជាឲ្យអភិបាលរាជធានី-ខេត្ត បង្ក្រាបល្បែងស៊ីសង
ខេត្តព្រះសីហនុ ៖ ប្រជាពលរដ្ឋ ជាពិសេសអាណាព្យាបាល រស់នៅក្រុងព្រះសីហនុ បង្ហាញអារម្មណ៍អបអរសាទរទៅលើ វិធានការក្តៅ របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលនៅព្រឹកថ្ងៃពុធ ទី១៤ ខែកុម្ភៈ ឆ្នាំ២០២៤នេះ បានបន្ត “ចេញបញ្ជាឱ្យអភិបាលរាជធានី-ខេត្តទាំងអស់ នៅទូទាំងប្រទេសកម្ពុជា ត្រួតពិនិត្យជាបន្ទាន់ លើទីតាំងល្បែងផ្សងសំណាង។ ហើយ ក្នុងករណីមានបន្តបើកថ្មីទៀត សូមចាត់វិធានការបិទជាបន្ទាន់ និងរាយការណ៍ផ្ទាល់ជូនសម្តេច”។
បទបញ្ជារបស់សម្តេចបវរធិបតី ហ៊ុន ម៉ាណែត បានកើតឡើង ស្របពេលមានសេចក្តីរាយការណ៍ ពីតាមបណ្តារាជធានី-ខេត្តមួយចំនួន ថា មានទីតាំងបើកលេងល្បែងស៊ីសងគ្រប់ប្រភេទ បានកើតឡើងយ៉ាងអនាធិបតេយ្យ ដោយគ្មានអាជ្ញាធរមានសមត្ថកិច្ច ទប់ស្កាត់ឡើយ។
ល្បែងស៊ីសងទាំងនោះ មានទាំងស្របច្បាប់ និងគ្មានច្បាប់ រួមមាន៖ ល្បែងឆ្នោតកន្ទុយលេខគ្រប់ប្រភេទ ឆ្នោតឡូតូ និងល្បែងស៊ីសងជាច្រើនប្រភេទទៀត គឺកើតមានព្រោងព្រាត ជាពិសេសនៅទីប្រជុំជនក្នុងក្រុង ឬទីផ្សារនានា តាមភោជនីយដ្ឋាន ឬទីតាំងលក់កាហ្វេជាដើម។
អាណាព្យាបាល រស់នៅក្រុងព្រះសីហនុ បានឲ្យ «កម្ពុជាថ្ងៃនេះ» ដឹងនៅរសៀលថ្ងៃពុធ ទី១៤ ខែកុម្ភៈ ថា ទីតាំងល្បែងស៊ីសង ជាច្រើនប្រភេទ បានបន្តបើកធ្វើអាជីវកម្មដោយគ្មានសមត្ថកិច្ចហាមឃាត់ រួមមាន៖ ឆ្នោតឡូតូ និងឆ្នោតកន្ទុយលេខគ្រប់ប្រភេទ គឺបន្តបើកធ្វើអាជីវកម្ម យ៉ាងអនាធិបតេយ្យ ដោយគ្មានសមត្ថកិច្ចស្ថាប័នពាក់ព័ន្ធ ចុះបង្ក្រាបទេ។
ជាក់ស្តែងល្បែង បច្ចុប្បន្ននេះ ល្បែងឆ្នោតកន្ទុយលេខ និងឆ្នោតឡូតូ បានកើតឡើងនៅគ្រប់ទីផ្សារ ក្នុងទីប្រជុំជន – កន្លែងដូរលុយ ឬទីតាំងលក់ដូរទូរសព្ទ នៅតាមទីកន្លែងនានា ជាពិសេសនៅផ្សារលើ – ផ្សារពាណិជ្ជកម្ម និងតាមផ្សារច្រើនទៀត ក្នុងក្រុងព្រះសីហនុ៕
