រថយន្ត៣គ្រឿងបុកប៉ះគ្នា បណ្តាលឲ្យជនជាតិចិន៤នាក់ រងរបួសធ្ងន់ស្រាល

ខេត្តព្រះសីហនុ៖ សមត្ថកិច្ចបានឱ្យដឹងថា នៅព្រឹក ថ្ងៃទី៥ ខែមករា ឆ្នាំ២០២៤ មានករណីគ្រោះថ្នាក់ចរាចរណ៍មួយ បានកើតឡើង រវាងរថយន្តបុកប៉ះ ជាមួយរថយន្ត នៅតាមបណ្តោយផ្លូវ ៤០ម៉ែត្រ ផ្លូវលេខ ៨៣៥ ស្ថិតនៅក្នុងភូមិ៦ សង្កាត់៤ ក្រុងព្រះសីហនុ ខេត្តព្រះសីហនុ បណ្តាលឲ្យជនជាតិចិនចំនួន ៤នាក់ បានរងរបួសធ្ងន់ស្រាល។

ប្រភពពីកន្លែងកើតហេតុ បានឲ្យដឹងថា នៅមុនពេលកើតហេតុ គេបានឃើញរថយន្តមួយគ្រឿង ម៉ាក Starix ពណ៌ខ្មៅ ពាក់ស្លាកលេខ ភ្នំពេញ 2BA-7808 បើកបរដោយបុរសម្នាក់ ក្នុងល្បឿនលឿន។ លុះមកដល់ចំណុចកើតហេតុ បានឡើងវ៉ាជេងរថយន្តមួយគ្រឿងម៉ាក Tundra ពណ៌ខ្មៅ ពាក់ស្លាកលេខ ភ្នំពេញ 2BF-1134 ក្រោយមក ក៏បានជ្រុលទៅបុក រថយន្តមួយគ្រឿងទៀត ម៉ាក RangRover ពណ៌ស ពាក់ស្លាកលេខ ភ្នំពេញ 2AW-7575 ក្នុងទិសដៅផ្ទុយគ្នា ចំពីមុខយ៉ាងពេញទំហឹង និងរេមកប៉ះគ្នាជាមួយរថយន្ត Tundra ខាងលើ ដែលបើកបរស្របទិសគ្នាបន្ថែមទៀត។

សមត្ថកិច្ច បានបញ្ជាក់ថា ក្រោយពេលកើតហេតុភ្លាមៗ នោះជនរងគ្រោះត្រូវបានបញ្ជូនយកទៅសង្គ្រោះបន្ទាន់នៅមន្ទីរពេទ្យឯកជនពេទ្យចិនមួយកន្លែងក្នុងក្រុងព្រះសីហនុ ។

បច្ចុប្បន្ន សមត្ថកិច្ចនគរបាលចរចារណ៍ផ្លូវគោក បានចុះមកជួយសម្រួលចរាចរណ៍នៅកន្លែងកើតហេតុ និងធ្វើការវាស់វែង រួចស្ទួចយកវត្ថុតាងរថយន្តខាងលើយកទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្តព្រះសីហនុ រងចាំធ្វើការដោះស្រាយបន្ត តាមនីតិវិធីច្បាប់៕ ដោយ៖ ហ្វារីត