នាវា Westerdam បានចូលចតជាថ្មី នៅកំពង់ផែក្រុងព្រះសីហនុ ខណៈឆ្នាំ២០២០អំឡុង ពិភពលោកផ្ទុះជំងឺកូវីដ-១៩ ប្រទេសមួយចំនួន មិនឲ្យចូលចត
ខេត្តព្រះសីហនុ ៖ មន្ត្រីជាន់ខ្ពស់កំពង់ផែ ក្រុងព្រះសីហនុ បានឲ្យដឹងថា នាវាទេសចរទេចរណ៍មួយគ្រឿងឈ្មោះ Westerdam បានចូលចតនៅកំពង់ផែអន្តរជាតិមួយនេះ ដូចការគ្រោងទុក កាលព្រឹកថ្ងៃទី២៨ ខែធ្នូ ឆ្នាំ២០២៣។
នាវាទេសចរណ៍នេះ មានផ្ទុកអ្នកទេសចរចម្រុះជាតិសាសន៍ចំនួន ១៩៩១នាក់ មានស្រីចំនួន ១០៣២នាក់ មានគោលដៅចូលមកទស្សនាប្រទេសកម្ពុជា រយៈពេលមួយថ្ងៃ។ នាវានេះ មាននាវឹកចំនួន ៧៨៣នាក់ ស្រីចំនួន ៦៤៨នាក់។
មន្ត្រីដដែល បញ្ជាក់ថា ការចូលមកដល់ នៃនាវាទេសចរណ៍ Westerdam ខាងលើនេះ គឺទទួលបានការស្វាគមន៍ យ៉ាងកក់ក្តៅពី ថ្នាក់ដឹកនាំក្រសួងស្ថាប័នពាក់ព័ន្ធ នៃរាជរដ្ឋាភិបាលកម្ពុជា ព្រមទាំងថ្នាក់ដឹកនាំរដ្ឋបាលខេត្តព្រះសីហនុ យ៉ាងរីករាយរាក់ទាក់។ នាវានេះ នឹងចាកចេញពីកំពង់ផែស្វយ័តក្រុងព្រះសីហនុ នៅម៉ោង ៩យប់ថ្ងៃទី២៨ ខែធ្នូ ឆ្នាំ២០២៣នេះ។
នៅក្នុងពិធីទទួលនាវាទេសចរណ៍ Westerdam នៅព្រឹកថ្ងៃនវេះ លោក សុខ សូកេន រដ្ឋមន្ត្រីក្រសួងទេសចរណ៍ មានប្រសាសន៍ស្វាគមន៍យ៉ាងកក់ក្តៅ ចំពោះភ្ញៀវទេសចរចម្រុះជាតិសាសន៍ ដែលបានចូលមកទស្សនាប្រទេសកម្ពុជា នៅពេលនេះ។
គួររំលឹកថា កាលពីអំឡុងពិភពលោក ក៏ដូចជាកម្ពុជា ឆ្លងឬផ្ទុះជំងឺកូវីដ-១៩ កាលពីឆ្នាំ២០២០ នាវា Westerdam ខាងលើនេះ ត្រូវបានប្រមុខដឹកនាំ រាជរដ្ឋាភិបាលកម្ពុជា អនុញ្ញាតឲ្យចូលចតនៅកំពង់ផែស្វយ័ត ក្រុងព្រះសីហនុ ដើម្បីជួយសង្គ្រោះអ្នកទេសចរ ចម្រុះជាតិសាសន៍រាប់ពាន់នាក់ ដែលជាប់គាំងនៅលើនាវានេះ បន្ទាប់ពីបណ្តាប្រទេសមួយចំនួន បានបដិសេធមិនឲ្យចូលចត ក្រោមហេតុផលខ្លាចឆ្លងមេរោគកូវីដ-១៩ ប៉ុន្តែមានតែកម្ពុជាមួយទេ ដែលបានអនុញ្ញាតឲ្យចូលចត ក្នុងន័យមនុស្សធម៌ ក៏ដូចជាមួយសង្គ្រោះអាយុជីវិតមនុស្សទាំងអស់នៅលើនាវានោះ។
យ៉ាងណា បន្ទាប់ពីនាវា Westerdam បានចូលចតដល់កំពង់ផែក្រុងព្រះសីហនុ កាលពីឆ្នាំ២០២០ គេសង្កេតឃើញថា អ្នកទេសចរចម្រុះជាតិសាសន៍រាប់ពាន់នាក់ ដែលមានវត្តមាន នៅលើនាវានេះ បានបង្ហាញក្តីរំភើប រីករាយរហូតមានជនបរទេសខ្លះ ស្រក់ទឹកភ្នែក ជាមួយនឹងការរំភើបដឹងគុណដល់ សម្តេចអគ្គមហាសេនាបតីតេជោ ហ៊ុន សែន ដែលកាលនោះ សម្តេចតេជោ នៅជានាយករដ្ឋមន្ត្រី នៃរាជរដ្ឋាភិបាលកម្ពុជា ដែលបានអនុញ្ញាតឲ្យនាវានេះ បានចូលចតក្នុងប្រទេសកម្ពុជា និងសម្រួលដល់ការធ្វើដំណើរបន្តតាមជើងយន្តហោះ ឆ្ពោះទៅកាន់ប្រទេសរៀងៗខ្លួន ដែលកាលនោះ បាននាំឲ្យប្រទេសកម្ពុជា មានឈ្មោះល្បីល្បាញលើពិភពលោក ជាប់ឈ្មោះជាប្រទេសតូច តែមានបេះដូងមនុស្សធម៌ ដ៏កធំសម្បើមថែមទៀតផង។
ចំណែក លោក សុខ សូកេន រដ្ឋមន្ត្រីក្រសួងទេសចរណ៍ នាឱកាសចូលរួមទទួលស្វាគមន៍ការវិលត្រឡប់ ឬការចូលចត របស់នាវាទេសចរណ៍ Westerdam នៅកំពង់ផែស្វយ័តក្រុងព្រះសីហនុ បានចាត់ទុក ការវិលត្រឡប់ជាថ្មី របស់នាវា Westerdam ថា ជាព្រឹត្តិការណ៍ប្រវត្តិសាស្រ្ត ខណៈ ប្រទេសកម្ពុជា កំពុងជម្រុញវិស័យទេសចរណ៍តាមផ្លូវទឹក ឲ្យបានច្រើនថែមទៀតនាថ្ងៃអនាគត៕
