តើ អ្នកឧកញ៉ា ហ៊ី គឹមហុង និងឧកញ៉ា ចេង សង្ហាក់ អគ្គនាយកក្រុមហ៊ុនពិភពដីមាស អាចរួចផុតពីសំណាញ់ច្បាប់ឬទេ?
ខេត្តកំពត ៖ មហាជន ជាពិសេសប្រជាពលរដ្ឋរងគ្រោះ កំពុងទន្ទឹងរង់ចាំមើលចំណាត់ការផ្លូវច្បាប់ ថាតើ អ្នកឧកញ៉ា ហ៉ី គឹមហុង និង ឧកញ៉ា ចេង សង្ហាក់ អគ្គនាយកក្រុមហ៊ុនពិភពដីមាស នឹងអាចប្រឈមមុខ ចំពោះការតាមចាប់ខ្លួនពីសំណាក់ កម្លាំងសមត្ថកិច្ច ដើម្បីឈានទៅកសាងសំណុំរឿងបញ្ជូនទៅកាន់តុលាការផ្តន្ទាទោស ឬបែបណា ទាក់ទងករណីឆបោកប្រជាពលរដ្ឋរាប់រយគ្រួសារ រស់នៅខេត្តកំពត។
យ៉ាងណាទាក់ទិនសំណុំរឿងនេះ តាមប្រភពបញ្ជាក់ថា សមត្ថកិច្ច ជំនាញ នៅតាមច្រកទ្វារអន្តរជាតិនានា បានទទួលបទបញ្ជាឱ្យឃាត់ខ្លួន បេីឃេីញមុខសញ្ញាបុគ្គលទាំងនេះ ធ្វើដំណើរឆ្លងដែន ចេញទៅក្រៅប្រទេស។
មានប្រជាពលរដ្ឋ រងគ្រោះរាប់រយគ្រួសារ បានអះអាងថា ពួកគាត់បានចាញ់បោកក្រុមហ៊ុនពិភពដីមាស សរុបអស់ទឹកប្រាក់រាប់សិបលានដុល្លារអាមេរិក។
ផ្ដើមពីបញ្ហានេះ សមត្ថកិច្ច នៃស្នងការដ្ឋាននគរបាលខេត្តកំពត ប្រកាសថា បេីប្រជាពលរដ្ឋរូបណាបានប្រទះឃេីញ ឈ្មោះ ហ៉ី គឹមហុង និង ឈ្មោះ ចេង សង្ហាក់ អគ្គនាយកក្រុមហ៊ុនពិភពដីមាស ដូចឃើញក្នុងរូបថតនេះ សូមមេត្តាផ្ដល់ព័ត៌មានមកកាន់ មន្ត្រីនគរបាលឱ្យបានឆាប់ ដេីម្បីអញ្ជេីញពួកគាត់ ដែលបោកលុយប្រជាពលរដ្ឋនោះ យកលុយមកសងពួកគាត់វិញ៕
