សារមន្ទីរព្រះនរោត្តមសីហនុ-អង្គរ នឹងរៀបចំពិព័រណ៍វត្ថុសិល្បៈ៣ប្រភេទ ដែលទទួលបានពីប្រជាពលរដ្ឋ រយៈពេលមួយឆ្នាំពេញ ចាប់ពីខែកក្កដាតទៅ
ខេត្តសៀមរាប ៖ មន្ត្រីថ្នាក់ដឹកនាំសារមន្ទីរព្រះនរោត្តមសីហនុ-អង្គរ នឹងរៀបចំពិព័រណ៍ បានឲ្យដឹងថា សារមន្ទីរ នឹងបង្ហាញអំពីវត្ថុសិល្បៈចំនួន ៣ប្រភេទ ដែលទទួលបានពីប្រជាពលរដ្ឋ ក្នុងរយៈពេលមួយឆ្នាំពេញ ដោយចាប់ផ្តើមពីដើមខែកក្កដា ឆ្នាំ២០២៣នេះតទៅ។
លោក ខួយ សាវឿត នាយកស្តីទី នៃសារមន្ទីរព្រះនរោត្តមសីហនុ-អង្គរ បានឲ្យដឹងថា ចាប់ពីថ្ងៃទី០៣ ខែកក្កដា ឆ្នាំ២០២៣ រហូតដល់ថ្ងៃទី៣១ ខែមិថុនា ឆ្នាំ២០២៤ សារមន្ទីរព្រះនរោត្តមសីហនុ-អង្គរ នឹងរៀបចំតាំងពិព័រណ៍ បង្ហាញអំពីកុលាលភាជន៍ និងវត្ថុសិល្បៈជាច្រើនប្រភេទទៀត ដែលប្រជាពលរដ្ឋ រស់នៅក្នុងតំបន់អង្គរ បានប្រគល់ជូនសារមន្ទីរ ដើម្បីបង្ហាញជូនសាធារណជនចូលទស្សនា សិក្សាស្វែងយល់ រយៈពេលមួយឆ្នាំពេញ។
លោកបន្តងថា ក្រោយពេលសារមន្ទីរទទួលបានការបរិច្ចាគ វត្ថុសិល្បៈទាំងនេះ ពីប្រជាពលរដ្ឋ មកថែរក្សា និងអភិរក្ស គឺសារមន្ទីរនឹងរៀបចំពិព័រណ៍ ដើម្បីបង្ហាញសាធារណជន នៅដើមខែកក្កដាខាងមុខ ដោយដាក់តាំងបង្ហាញ កុលាលភាជន៍ ចំនួន១៦ ដែលជាប្រភេទកុលាលភាជន៍រឹង មានស្រទាប់រលោងពណ៌ត្នោត និងពណ៌បៃតង ដោយភាជន៍ទាំងនេះ ត្រូវគេដុតក្នុងឡកំដៅ ចន្លោះពី ១,០០០ ទៅ១,២០០អង្សាសេ។ ហើយ ភាជន៍ទាំង១៦នេះ មានប្រភពមកពីភូមិចំនួន៨ ក្នុងភូមិសាស្ត្រខេត្តសៀមរាប។
លោក ខួយ សាវឿត ឲ្យដឹងដូច្នេះ រួចបន្តថា ក្រៅពីកុលាលភាជន៍ និងវត្ថុសិល្បៈមួយចំនួន ស្ថិតនៅសម័យបុរេប្រវត្តិសាស្ត្រ ហើយជាវត្ថុសក្ការៈ សម្រាប់បញ្ចុះនៅតាមប្រាសាទ រួមទាំងវត្ថុសិល្បៈ ដែលទទួលបានពីវត្តអារញ្ញរង្សី ដោយប្រភេទវត្ថុសិល្បៈទាំងនេះ មានអាយុកាលខុសៗគ្នា និងមានប្រភពផ្សេងៗគ្នា។ ដូច្នេះ សូមសាធារណជន សិស្សានុសិស្ស និសិ្សត លោកគ្រូអ្នកគ្រូ និងអ្នកស្រាវជ្រាវ អាចអញ្ជើញមកសិក្សាស្វែងយល់ឲ្យកាន់តែច្បាស់ អំពីប្រវត្តិ នៃវត្ថុសិល្បៈទាំងនោះ ដោយមានមន្ត្រីជំនាញធ្វើបទបង្ហាញជូន អំពីព័ត៌មានថ្មីៗ ទាក់ទងនិងការស្រាវជ្រាវ ការប្រតិបត្តិសាសនា វិស័យពាណិជ្ជកម្ម និងការចូលរួមចំណែក របស់ប្រជាជន ក្នុងការថែរក្សាវត្ថុបុរាណ និងសម្បត្តិបេតកភណ្ឌជាតិប្រកបដោយនិរន្តរភាព។ ហើយពិធីតាំងពិព័រណ៍នេះ នឹងចាប់ផ្តើមពីថ្ងៃទី០៣ ខែកក្កដា ឆ្នាំ២០២៣នេះតទៅ។
សូមជម្រាបផងថា សារមន្ទីរព្រះនរោត្តមសីហនុ-អង្គរ បានបើកដំណើរការជាផ្លូវការ តាំងពីឆ្នាំ២០០៨មក ដោយមានថែរក្សា និងអភិរក្ស វត្ថុសិល្បៈពីបុរាណជាច្រើន ដែលបានមកពីការធ្វើកំណាយស្រាវជ្រាវនានា យកមករក្សាទុកនៅទីនេះ។ សារមន្ទីរនេះ មានទីតាំងស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប។ ហើយ បានបើកឱ្យភ្ញៀវទេសចរជាតិ និងអន្តរជាតិ ចូលទស្សនាចាប់ពីថ្ងៃអង្គារ ដល់ថ្ងៃអាទិត្យ វេលាម៉ោង ៨ និង៣០នាទីព្រឹក ដល់ម៉ោង ៤ និង៣០ល្ងាច ទំនាក់ទំនងទូរស័ព្ទលេខ៖ ០៦៣ ៧៦៣ ៥៧៥៕
អត្ថបទ៖នាយកដ្ឋាន៖ស្រាវជ្រាវ បណ្តុះបណ្តាល និងផ្សព្វផ្សាយ
រូបភាព៖ លោក រ៉ុង អង្គររ៉ែល និងលោក ភោគ ជា
