ក្រុមអាជីវករ បន្តព្រួយបារម្ភចំពោះបទល្មើស ចាប់បង្ខាំងមនុស្សជំរិតទារប្រាក់ បង្កដោយក្រុមសង្គមងងឹតជនជាតិចិន នៅក្រុងព្រះសីហនុ
ខេត្តព្រះសីហនុ ៖ ប្រជាពលរដ្ឋ ក៏ដូចជាអ្នកជំនួញជាតិ-អន្តរជាតិ បានបង្ហាញការព្រួយបារម្ភជាថ្មីទៀត ចំពោះបទល្មើសចាប់បង្ខាំងមនុស្សជំរិតទារប្រាក់ ផ្តើមដោយជនសង្គមងងឹតជនជាតិចិន ដែលបន្តធ្វើសកម្មភាពយ៉ាងសកម្ម ក្នុងក្រុងព្រះសីហនុ បង្កការភ័យខ្លាចដល់អាជីវករ កំពុងប្រកបមុខរបរស្របច្បាប់ នៅក្នុងមូលដ្ឋាននេះ។
ការព្រួយបារម្ភនេះ បានកើតឡើងបន្ទាប់ពី កាលពីយប់ថ្ងៃទី២១ ខែមិថុនា ឆ្នាំ២០២៣ វេលាម៉ោង ០៩ និង៣០នាទី មានករណីបទល្មើស ចាប់បង្ខាំងមនុស្សធ្វើទារុណកម្មជំរិតទារប្រាក់មួយករណីទៀត បង្កដោយក្រុមសង្គមងងឹតជនជាតិចិន មានគ្នាប្រមាណ ៤ទៅ៥នាក់ បានធ្វើសកម្មភាពចាប់បង្ខាំងបុរសអ្នកជំនួញជនជាតិចិនម្នាក់ ធ្វើទារុណកម្មលើរាងកាយ រួចបង្ខំឲ្យជនរងគ្រោះ ទូរស័ព្ទទៅសាច់ញាតិ ឲ្យយកលុយចំនួន ១២ម៉ឺនដុល្លារអាមេរិក មកឲ្យពួកគេ ជាថ្នូរដោះលែងឲ្យមានសេរីភាពវិញ។
ជនរងគ្រោះ ត្រូវបានជនសង្ស័យ ចាប់បង្ខាំងខ្លួននៅក្នុងបន្ទប់លេខ៦១៣ ជាន់ទី៦ នៃអគារក្រុមហ៊ុន ហ្សុងស៊ីង ស្ថិតក្នុងភូមិ៣ សង្កាត់លេខ៣ ក្រុង-ខេត្តព្រះសីហនុ។ ហើយភ្លាមៗបន្ទាប់ពីទទួលបានព័ត៌មានតាមទូរស័ព្ទពីជនរងគ្រោះ គឺបងជីដូនមួយជនរងគ្រោះ ដែលជាជាអ្នកជំនួញជនជាតិចិនដូចគ្នា ហើយមានភរិយាជាជនជាតិខ្មែរ រស់នៅក្រុងព្រះសីហនុ បានប្តឹងទៅកម្លាំងសមត្ថកិច្ចខេត្តព្រះសីហនុ ឲ្យជួយអន្តរាគមន៍ចុះបង្ក្រាប និងសង្គ្រោះជនរងគ្រោះ នៅម៉ោងជាង ២កណ្តាលអាធ្រាត្រ ឆ្លងចូលថ្ងៃទី២២ ខែមិថុនា ឆ្នាំ២០២៣។
ជនរងគ្រោះមានឈ្មោះ ជាង ម៉ីង ហ៊ួយ (JIANG MING HUI) ភេទប្រុស អាយុ ៤៣ឆ្នាំ ជនជាតិចិន សញ្ជាតិចិន មុខរបរអាជីវករ ស្នាក់នៅសង្កាត់លេខ១ ក្រុង-ខេត្តព្រះសីហនុ។
ក្រោយបានជួយសង្គ្រោះរួចផុត ពីការបង្ខាំងធ្វើទារុណកម្មដោយក្រុមជនល្មើស ជនរងគ្រោះ ឈ្មោះ ជាង ម៉ីង ហ៊ួយ (JIANG MING HUI) ថ្លែងថា រូបគាត់មានអារម្មណ៍ភ័យខ្លាចពីសុវត្ថិភាព ក្នុងការបន្តប្រកបមុខរបរ របស់ខ្លួន ក្នុងក្រុងព្រះសីហនុតទៅទៀតនាថ្ងៃអនាគត ព្រោះបារម្ភខ្លាច ក្រុមសង្គមងងឹត ដែលមានខ្សែបណ្តាញ នៅក្នុងក្រុងនេះ នឹងអាចធ្វើសកម្មភាពចាប់បង្ខាំងរូបលោក នៅថ្ងៃខាងមុខទៀត។
យ៉ាងនេះក្តី កាលពីថ្ងៃទី២២ ខែមិថុនា ឆ្នាំ២០២៣ ជនរងគ្រោះរូបនេះ បានដាក់ពាក្យបណ្ដឹងទៅកាន់ បញ្ជាការរដ្ឋានកងរាជអាវុធហត្ថខេត្តព្រះសីហនុ ដោយបញ្ជាក់ក្នុងកម្មវត្ថុថា «សុំប្ដឹងឈ្មោះ ស៊ើ អ៉ិ (SHI YI) ភេទប្រុស ជនជាតិចិន។ បច្ចុប្បន្នស្នាក់នៅភូមិ៣ សង្កាត់លេខ៣ ក្រុង-ខេត្តព្រះសីហនុ និងបក្ខពួក ជនជាតិចិនចំនួន ៤នាក់ទៀត»។
តបតាមកម្មវត្ថុខាងលើ ខ្ញុំបាទសូមជម្រាបជូន លោកមេបញ្ជាការ មេត្តាជ្រាបថា នៅម៉ោង ២១ និង៣០នាទី យប់ថ្ងៃទី២១ ខែមិថុនា ឆ្នាំ២០២៣ ឈ្មោះ ស៊ើ អ៉ិ (SHI YI) បានហៅខ្ញុំ ទៅពិភាក្សាការងាររកស៊ី នៅបន្ទប់លេខ៦១៣ ជាន់ទី៦ នៃអគារ ក្រុមហ៊ុន ហ្សុងស៊ីង មានទីតាំងស្ថិតក្នុងភូមិ៣ សង្កាត់លេខ៣ ក្រុងព្រះសីហនុ។ ពេលរូបខ្ញុំ ចូលពិភាក្សាជាមួយឈ្មោះ ស៊ើ អ៉ិ (SHI YI) បានបន្ដិច ក៏ស្រាប់តែឈ្មោះ ស៊ើ អ៉ិ (SHI YI) ដើរចេញទៅក្រៅបន្ទប់ ហើយក្រោយមក ក៏ឃើញគេដើរចូលមកក្នុងបន្ទប់វិញ។ ហើយរូបខ្ញុំ និងឈ្មោះ ស៊ើ អ៉ិ (SHI YI) ក៏បន្តការពិភាក្សាគ្នាបន្តទៀត។ ប៉ុន្តែក្នុងពេលកំពុងជជែកគ្នានេះ ក៏ស្រាប់តែ ឈ្មោះ ស៊ើ អ៉ិ (SHI YI) បានដើរទៅក្រៅបន្ទប់ជាថ្មីទៀត គឺចេញទៅមួយសន្ទុះធំ ហើយពេលត្រឡប់មកវិញ ក៏ឃើញមានបក្ខពួកចំនួន ៤នាក់ទៀត ជាជនជាតិចិន ចូលមកក្នុងបន្ទប់ពិភាក្សាការងារជាមួយគ្នាដែរ។ បន្ទាប់មក បក្ខពួក របស់ឈ្មោះ ស៊ើ អ៉ិ (SHI YI) ទាំង ៤នាក់នោះ ក៏បានព្រួតគ្នាវាយធ្វើបាប រូបខ្ញុំ ដោយប្រើដៃ និងយកប៉ាន់តែ វាយក្បាល របស់ខ្ញុំ បែកក្បាលហូរឈាមដេរ ១២ថ្នេរ និងឈឺចុកពេញរាងកាយ។ ហើយភ្លាមៗនោះ ឈ្មោះស៊ើ អ៉ិ (SHI YI) ក៏បានបង្ខំឲ្យរូបខ្ញុំ សរសេរកិច្ចសន្យាខ្ចីប្រាក់ ព្រមទាំងថតវីដេអូ អំពីសកម្មភាព របស់ខ្ញុំ ផងដែរ។
ជនរងគ្រោះរៀបរាប់ក្នុងបណ្តឹងបន្តទៀតថា បន្ទាប់ពីបក្ខពួក ឈ្មោះ ស៊ើ អ៉ិ (SHI YI) ប្រើហិង្សា និងថតវីដេអូ លើរូបខ្ញុំរួច គឺជនជាតិចិន ៤នាក់នោះ ក៏ចាប់ផ្ដើមទារប្រាក់ពីខ្ញុំ ចំនួន ១២ម៉ឺនដុល្លារ (ដប់ពីរម៉ឺនដុល្លារ) ជាថ្នូរនៃការដោះលែងខ្ញុំបាទ។ ហើយពួកគេ បានគម្រាមខ្ញុំថា បើសិនខ្ញុំ មិនមានប្រាក់ឲ្យទេ ពួកគេនឹងសម្លាប់ខ្ញុំ រួចពួកគេទាំង ៤នាក់ បានដកហូតយកទូរស័ព្ទដៃ របស់ខ្ញុំ លុបទិន្នន័យ ដែលខ្ញុំ បានទាក់ទងជាមួយឈ្មោះ ស៊ើ អ៉ិ (SHI YI) និងទិន្នន័យ អ៊ែប (APP) នៅក្នុងទូរស័ព្ទដៃ របស់ខ្ញុំ ចោលទាំងអស់។
ជនរងគ្រោះបន្តទៀតថា បន្ទាប់ពីជនល្មើសទាំងនោះ បានលុបទិន្នន័យអស់ហើយ ពួកគេ ក៏បានហុចទូរស័ព្ទដៃមកឲ្យខ្ញុំវិញ ដើម្បីឲ្យទាក់ទងរកប្រាក់ឲ្យពួកគេ។ គ្រាន់តែខ្ញុំបាទ ទទួលបានទូរស័ព្ទ ខ្ញុំ ក៏បានទាក់ទងទៅបងប្រុសជីដូនមួយ របស់ខ្ញុំ ឈ្មោះ អាង ហ៊ួយ (HAUNG HUI) ជនជាតិចិន ដើម្បីឲ្យគាត់មកជួយរូបខ្ញុំ។ ហើយ រហូតដល់ម៉ោង ២ និង៣៤នាទី ថ្ងៃទី២២ ខែមិថុនា ក៏ឃើញបងជីដូនមួយឈ្មោះ អាង ហ៊ួយ (HAUNG HUI) និងប្រពន្ធរបស់គាត់ ដែលជាជនជាតិខ្មែរ បានចុះមកដល់ទីតាំង ក្រុមហ៊ុន ហ្សុងស៊ីង និងបានជួយរំដោះ រូបខ្ញុំ ចេញពីបន្ទប់ធ្វើទារុណកម្ម។
ជនរងគ្រោះបញ្ជាក់បន្តថា ក្នុងអំឡុងពេលបក្ខពួក ឈ្មោះ ស៊ើ អ៉ិ (SHI YI) នាំគ្នាវាយធ្វើបាបលើរូបខ្ញុំ គឺឈ្មោះ ស៊ើ អ៉ិ (SHI YI) មិនបានចូលរួមប្រើហិង្សាលើខ្ញុំទេ ដោយជននេះ ជាអ្នកបញ្ជា និងឈរមើលគេវាយធ្វើបាបលើរូបខ្ញុំ ហើយពេលបក្ខពួក យកទូរស័ព្ទដៃ របស់ខ្ញុំ លុបទិន្នន័យចោល ក៏ឈ្មោះ ស៊ើ អ៉ិ (SHI YI) នៅក្នុងបន្ទប់នោះដែរ។
ទាក់ទិនសំណុំរឿងនេះ សាច់ញាតិជនរងគ្រោះ ឲ្យដឹងថា បន្ទាប់ពីជនរងគ្រោះ បានដាក់ពាក្យបណ្ដឹងនៅបញ្ជាការដ្ឋានកងរាជអាវុធហត្ថខេត្តព្រះសីហនុរួច គឺជនរងគ្រោះ ត្រូវបានក្រុមគ្រួសារសាច់ញាតិ បញ្ជូនទៅព្យាបាលរបួសនៅមន្ទីរពេទ្យ ក្នុងទីក្រុងភ្នំពេញ ព្រោះជនរងគ្រោះមានអាការៈក្អួត ហើយបដិសេធមិនព្រមព្យាបាលពេទ្យ នៅក្នុងក្រុងព្រះសីហនុទេ ដោយបារម្ភពីសុវត្ថិភាព។
មន្រ្តីកងរាជអាវុធហត្ថខេត្តព្រះសីហនុ ស្នើមិនបង្ហាញអត្តសញ្ញាណម្នាក់ បានឲ្យដឹងថា សំណុំរឿងបង្ខាំងមនុស្សជំរិតទារប្រាក់នេះ គឺកម្លាំងជំនាញ បានចាប់ខ្លួនជនសង្ស័យឈ្មោះ ស៊ើ អ៉ិ (SHI YI) ដែលជាមេខ្លោងតែម្នាក់ទេ ដោយបក្ខពួក ៤នាក់ទៀត ដែលជនរងគ្រោះបានប្តឹងដែរ គឺ មិនទាន់បានចាប់ខ្លួននៅឡើយ។ ប្រភពបន្តថា ក្រោយសួរចម្លើយ មេក្លោងរូបនេះ បានឆ្លើយសារភាព តបទៅពាក្យបណ្ដឹង របស់ជនរងគ្រោះថា ក្នុងហេតុការណ៍ខាងលើ គឺរូបគេជាអ្នកប្រព្រឹត្តតែម្នាក់ឯង ដោយពុំមានបក្ខពួកណាចូលរួមនោះទេ។
ប្រភពបន្តទៀតថា ជនសង្ស័យ ឈ្មោះ ស៊ើ អ៉ិ (SHI YI) ត្រូវបានកម្លាំងកងរាជអាវុធហត្ថព្រះសីហនុ កសាងសំណុំរឿងបញ្ជូនទៅកាន់ សាលាដំបូងខេត្តព្រះសីហនុ កាលពីថ្ងៃទី២៥ ខែមិថុនា ដើម្បីបន្តនីតិវិធីតាមផ្លូវច្បាប់។ ហើយសំណុំរឿងនេះ ក៏ត្រូវបានអយ្យការអមសាលាដំបូងខេត្តព្រះសីហនុ សម្រេចចោទប្រកាន់មេខ្លោងរូបនេះពីបទ «ចាប់មនុស្សឃុំឃាំង និងបង្ខាំងដោយខុសច្បាប់ មានស្ថានទម្ងន់ទោស»។
យ៉ាងណាក៏ដោយចុះ សំណុំរឿងនេះ គេហទំព័រ «កម្ពុជាថ្ងៃនេះ» នៅមិនទាន់អាចទាក់ទង លោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ ដើម្បីបញ្ជាក់បន្ថែមបានទេ នៅរសៀលថ្ងៃទី២៧ ខែមិថុនា ខណៈ លោក ធុច បញ្ចសន្តិភាព អ្នកនាំពាក្យអយ្យការអមសាលាដំបូងខេត្តព្រះសីហនុ ក៏មិនលើកទូរស័ព្ទ និងមិនព្រមឆ្លើយតបតាមប្រព័ន្ធតេឡេក្រាម (Telegram) ដោយគ្រាន់តែបើកមើលសំណួរ ប៉ុន្តែគ្មានការឆ្លើយតប៕
