គ្រួសារស្ត្រីរងគ្រោះចោទ មន្ទីរពហុព្យាបាលនិងសម្ភពអង្គរធំ វះកាត់ឆ្លងទន្លេ ប៉ះពាល់ដល់អាយុជីវិតទារក
រាជធានីភ្នំពេញ ៖ ស្ត្រីជាម្តាយទារកម្នាក់ រួមទាំងក្រុមគ្រួសារ បានលើគ្នាទៅប្រមូលផ្តុំគ្នា នៅពីមុខមន្ទីរពហុព្យាបាល និងសម្ភពអង្គរធំ ដើម្បីទាមទារអោយម្ចាស់គ្លីនិកនេះ រួមទាំងក្រុមគ្រូពេទ្យទទួលខុសត្រូវ ចំពោះការវះកាត់សម្រាលកូនមានការធ្វេសប្រហែស បណ្តាលអោយទារក ដែលទើបកើតនោះ នៅសល់តែដង្ហើមចុងក្រោយ (រស់ដោយសារតែអ៊ុកស៊ីហ្សែន)។
ការលើកគ្នាទាមទាររកយុត្តិធម៌នេះ បានបង្កអោយមានការភ្ញាក់ផ្អើល នៅសៀលថ្ងៃទី០៦ ខែមិថុនា ឆ្នាំ២០២៣ នៅចំណុចមុខមន្ទីរពហុព្យាបាល និងសម្ភពអង្គរធំ តាមផ្លូវកម្ពុជាក្រោម កែងផ្លូវលេខ២៥៧ ក្នុងសង្កាត់ទឹកល្អក់ទី១ខណ្ឌទួលគោក រាជធានីភ្នំពេញ។
ស្ត្រីឈ្មោះ ញ៉ែម ស្រីរ័ត្ន មានលំនៅភូមិស្លែង ឃុំត្រពាំងវែង ស្រុកកណ្តាលស្ទឹង ខេត្តកណ្តាល ដែលត្រូវជាម្តាយទារក បានឲ្យដឹងថា រូបគាត់ បានគ្រប់ខែមកសម្រាកឆ្លងទន្លេកូនទី២ និងបានសម្រាលកូនដោយវះកាត់ នៅមន្ទីរពហុព្យាបាល និងសម្ភពអង្គរធំនេះ នៅម៉ោង ១និង៣០នាទី រសៀលថ្ងៃទី០២ ខែមិថុនា ឆ្នាំ២០២៣។ ហើយពេលវះកាត់ កូនមានបញ្ហាសុខភាព ដោយឈ្លក់ទឹកភ្លោះ។
ខណៈនោះ ក្រុមគ្រូពេទ្យ ក៏បានរៀបចំបញ្ជូនកូន របស់គាត់ ទៅកាន់មន្ទីរពេទ្យកុមារជាតិ ដោយមិនបានដាក់អ៊ុកស៊ីហ្សែនសង្គ្រោះឲ្យកូនគាត់ នៅពេលដឹកតាមម៉ូតូកង់៣នោះទេ។ ហើយ ពេលទៅដល់មន្ទីរពេទ្យ ត្រូវក្រុមគ្រូពេទ្យនៅមន្ទីរពេទ្យកុមារជាតិ ប្រាប់ថា គ្មានសង្ឃឹមទេ គឺទារកនេះ នៅសល់តែដង្ហើមចុងក្រោយប៉ុណ្ណោះ។
ត្រង់ចំណុចនេះ ស្ត្រីជាម្តាយ ក៏បានចោទប្រកាន់ថា នេះជាការធ្វេសប្រហែស របស់ក្រុមគ្រូពេទ្យ និងម្ចាស់គ្លីនិក ទើបធ្វើឱ្យកូនរបស់គាត់ មានបញ្ហាគ្រោះថ្នាក់ដល់អាយុជីវីត។ ទើបនៅថ្ងៃទី០៥ ខែមិថុនា ក៏បានមកគ្លីនិកខាងលើនេះ សូមអោយម្ចាស់គ្លីនិកនេះ ទទួលខុសត្រូវម្តងហើយៗ នៅថ្ងៃទី០៦ ខែមិថុនា ក៏បាននាំគ្នាមកម្តងទៀត ដើម្បីស្នើរអោយសមត្ថកិច្ចជួយរកយុត្តិធម៌។
ទាក់ទិនបញ្ហានេះដែរ ឪពុកទារករងគ្រោះ និងសាច់ញាតិ ក៏បានទទួចស្នើសុំដល់សមត្ថកិច្ច ជាពិសេស ក្រសួងសុខាភិបាល ស្នើឲ្យជួយរកយុត្តិធម៌ និងជួយអន្តរាគមន៍ ទៅម្ចាស់មន្ទីរពហុព្យាបាល និងសម្ភពអង្គរធំ ឲ្យទទួលខុសត្រូវចំពោះកំហុសឆ្គងរបស់ខ្លួន។
យ៉ាងណាក៏ដោយចុះ មិនទាន់មានការបំភ្លឺណាមួយពីម្ចាស់ មន្ទីរពហុព្យាបាល និងសម្ភពអង្គរធំ នៅឡើយទេ នៅថ្ងៃទី០៧ ខែមិថុនា ឆ្នាំ២០២៣នេះ៕
