កូនៗខលមកឪពុកម្តាយ មិនលើកទូរសព្ទ័ ពេលទៅមើល ឃើញស្លាប់ក្នុងផ្ទះទាំង២នាក់
ខេត្តបាត់ដំបង ៖ អ្នកភូមិ និងសមត្ថកិច្ច មានការភ្ញាក់ផ្អើលក្រោយពីគេប្រទះឃើញសាក សព ពីរនាក់ប្ដីប្រពន្ធ ដែលមានវ័យចំណាស់ដេកស្លាប់យ៉ាងអាណោចអធ័មនៅក្នុងផ្ទះ កាលពីព្រឹកថ្ងៃទី០៧ ឧសភា ស្ថិតនៅចំណុចភូមិកំពង់ពិល ឃុំវត្តតាមិម ស្រុកសង្កែ ដែលសមត្ថកិច្ចសន្និដ្ឋានថា អាចស្លាប់ដោយសារជំងឺ និងអត់អាហារ រហូតដល់សាកសពប្ដីមានក្លិនស្អុយទៅហើយ ។
តាមរបាយការណ៍ សមត្ថកិច្ច បានឲ្យដឹងថា សាកសពជនរងគ្រោះពីរនាក់ប្ដីប្រពន្ធ ឈ្មោះ សូ សំអឿន អាយុ ៧៦ឆ្នាំ (ប្ដី) និង ឈ្មោះ អ៊ិត លឿត អាយុ ៦៦ឆ្នាំ (ប្រពន្ធ) នៅភូមិ ឃុំកើតហេតុខាងលើ។
របាយការណ៍ដដែលបញ្ជាក់ថា សាកសពប្ដី ស្ថិតក្នុងសភាពហើមស្អុយ ដែលអាចស្លាប់ច្រើនថ្ងៃ ដេកស្លាប់ នៅលើប៉ៅអី រីឯសាកសពប្រពន្ធដេកស្លាប់នៅលើគ្រែក្នុងបន្ទប់ ។
សាកសពប្ដីប្រពន្ធវ័យចំណាស់នេះ ត្រូវបានកូនប្រុសឈ្មោះ សូ ច័ន្ទដុល្លា អាយុ ៣៣ឆ្នាំ រស់នៅខេត្តបន្ទាយមានជ័យ ជាអ្នកប្រទះឃើញដំបូងគេ នៅពេលមកលេងផ្ទះឪពុកម្ដាយ នៅព្រឹកថ្ងៃទី០៧ ឧសភា ហើយក៏មានការភ្ញាក់ផ្អើលទាំងសមត្ថកិច្ច ទាំងអ្នកភូមិតែម្ដង។
នៅផ្ទះកើតហេតុ កូនៗ របស់ជនរងគ្រោះ បានរាយការណ៍ប្រាប់សមត្ថកិច្ចប្រហាក់ប្រហែលគ្នាថា ឪពុកខ្លួនមានជំងឺច្រើនមុខ ដូចជា៖ ជំងឺទឹកនោមផ្អែម ទឹកនោមប្រៃ និងជំងឺលើសឈាមធ្ងន់ធ្ងរ តែគាត់អាចដើរបាន។ រីឯម្ដាយវិញ មានជំងឺរ៉ាំរ៉ៃដេកលើគ្រែមិនអាចងើបរួចទេ គឺគាត់កើតជំងឺពុកឆ្អឹងខ្នង និងដំបៅក្រពះធ្ងន់ធ្ងរ។ កូនៗ បានបញ្ជាក់ថា កូនៗទាំងអស់ រស់នៅឆ្ងាយពីផ្ទះឪពុកម្ដាយ មិនសូវបានទៅលេងទេ តែយូរៗទើបទៅលែងឪពុកម្ដាយម្ដង។ ហើយមូលហេតុ ដែលយូរៗ ទើបកូនៗនាំគ្នាទៅលេងឪពុកម្ដាយម្ដង ដោយសារតែឪពុកកាចពេក។ គាត់តែងឈ្លោះប្រកែក ឬស្ដីបន្ទោសកូនៗ ពេលទៅលេងគាត់ម្ដងៗ ហើយពេលខ្លះឈ្លោះ រហូតទាញកាំបិតរកកាប់កូនចៅទៀតផង។ ដូច្នេះហើយ ទើបកូនៗ មិនសូវបានទៅមើលថែទាំជំងឺពួកគាត់ទាំងពីរ បានត្រឹមតែទូរស័ព្ទទៅសួរសុខទុក្ខប៉ុណ្ណោះ។
កូនប្រុសជនរងគ្រោះ លោក សូ ច័ន្ទដុល្លា ដែលបានប្រទះឃើញសពឪពុកម្ដាយខ្លួនដំបូងគេ បានប្រាប់សមត្ថកិច្ចថា កាលពីថ្ងៃទី០៥ ខែឧសភា ខ្លួនបានទូរស័ព្ទទៅសួរសុខទុក្ខឪពុក តែពុំមានអ្នកលើកទូរស័ព្ទទេ ។
លុះនៅព្រឹកថ្ងៃទី០៧ ខែឧសភា ខ្លួននិងប្រពន្ធកូន ក៏ជិះម៉ូតូកង់បីពីខេត្តបន្ទាយមានជ័យ ទៅផ្ទះឪពុកម្ដាយ។
លោក ច័ន្ទដុល្លា និយាយថា ពេលទៅដល់ផ្ទះឪពុកម្ដាយ ឃើញទ្វាររបង និងទ្វារផ្ទះចំហរមិនចាក់សោរទេ។ ពេលនោះ ស្រាប់តែខ្លួន បានឃើញឪពុកដេកស្លាប់លើប៉ៅអី រីឯម្ដាយដេកស្លាប់លើគ្រែក្នុងបន្ទប់ គួរឲ្យរន្ធត់ចិត្តក្រៃលេង ហើយភ្លាមៗនោះ ខ្លួនក៏ជិះកង់បីទៅតាមបងស្រី ឲ្យមកជួយមើលតែម្ដងទៅ។
សមត្ថកិច្ច បានចុះទៅកាន់ផ្ទះជនរងគ្រោះភ្លាមៗដែរ ក្រោយពីទទូលបានព័ត៌មាននេះ ដើម្បីពិនិត្យសាកសពនិងកន្លែងកើតហេតុ។
មន្ត្រីជំនាញ ដែលចុះទៅពិនិត្យសាកសព បានឲ្យដឹងថា សាកសពប្ដីមានសភាពហើមស្អុយ ដែលអាចស្លាប់ មុនពេលកូនប្រុសទូរស័ព្ទទៅសួរសុខទុក្ខ (០៥ ០៥ ២៣)។ រីឯប្រពន្ធ អាចស្លាប់នៅថ្ងៃទី០៧ ខែឧសភា មុនពេលកូនទៅដល់ ព្រោះសាកសពប្រពន្ធហាក់មានសភាពថ្មីៗ។
មន្ត្រីដដែល បានបញ្ជាក់ថា បើតាមការពិនិត្យលើសាកសពទាំងពីរ ពុំមានស្លាកស្នាម ឬរកឃើញវត្ថុតាងអ្វីគួរឲ្យសង្ស័យទៅលើករណីផ្សេងឡើយ។
ត្រង់ចំណុចនេះ បើតាមកំណត់ហេតុ របស់មន្ត្រីជំនាញ ដែលធ្វើការសន្និដ្ឋាន ដោយយោងលើការបំភ្លឺពីកូនៗ របស់ជនរងគ្រោះ ដែលនិយាយពីស្ថានភាពជំងឺរ៉ាំរ៉ៃឪពុកម្ដាយខ្លួន បានឲ្យដឹងថា ជនរងគ្រោះឈ្មោះ សូ សំអឿន (ប្ដី) អាចស្លាប់ដោយ «គាំងបេះដូង» ដែលបណ្ដាលមកពីសម្ពាធឈាមឡើងខ្លាំង ចំណែកជនរងគ្រោះឈ្មោះ អ៊ិត លឿត (ប្រពន្ធ) អាចស្លាប់ដោយ «អត់អាហារ និងជំងឺដំបៅក្រពះធ្ងន់ធ្ងរ» ។
បើតាមកូនៗជនរងគ្រោះ ក៏បានបញ្ជាក់ដែរថា កន្លងមក (មុនពេលកើតហេតុ) ឪពុកខ្លួនមានជំងឺច្រើន តែអាចដើរហើរ និងធ្វើម្ហូបអាហារឲ្យម្ដាយខ្លួនពិសាបាន ព្រោះម្ដាយខ្លួនឈឺធ្ងន់ ដេកលើគ្រែ ងើបមិនរួចទេ។
រីឯសាក្សីនៅក្បែរខាង ក៏បាននិយាយដែរថា កន្លងមក គេតែងឃើញប្ដី របស់គាត់ជិះម៉ូតូកង់បីចេញក្រៅ តែប៉ុន្មានថ្ងៃចុងក្រោយនេះ បាត់គាត់មិនឃើញចេញក្រៅសោះ លុះនៅថ្ងៃទី០៧ ខែឧសភា ស្រាប់តែមានការភ្ញាក់ផ្អើលថា តានិងយាយ បានដេកស្លាប់នៅក្នុងផ្ទះអស់ទៅហើយ។
ស្នងការរងទទួលផែនព្រហ្មទណ្ឌ លោក លឹម ពុទ្ធីឡា បានប្រាប់ថា ករណីជនរងគ្រោះ ដេកស្លាប់ពីរនាក់ប្ដីប្រពន្ធខាងលើនេះ មិនជាប់ពាក់ព័ន្ធនឹងអំពើឃាតកម្ម ឬពាក់ព័ន្ធនឹងបទល្មើសអ្វីផ្សេងទេ។
មន្ត្រីជំនាញ បានធ្វើការសន្និដ្ឋានទៅលើសពជនរងគ្រោះពីរនាក់ប្ដីប្រពន្ធនេះ ក្រោយពីធ្វើការពិនិត្យយ៉ាងហ្មត់ចត់ គឺ ជនរងគ្រោះប្ដីប្រពន្ធ «ស្លាប់ដោយសារជំងឺប្រចាំកាយដ៏រ៉ាំរ៉ៃ និងអត់អាហារ»។
លោក លឹម ពុទ្ធីឡា បានបញ្ជាក់ដែរថា សូម្បីទ្រព្យសម្បត្តិ លុយកាក់ មាសប្រាក់ របស់គាត់ ក៏ពុំមានបាត់បង់ដែរ ត្រូវបានរកឃើញ និងប្រគល់ជូនកូនៗ ជនរងគ្រោះវិញទាំងអស់។ ដូច្នេះ ការស្លាប់របស់ជនរងគ្រោះប្ដីប្រពន្ធខាងលើនេះ គឺស្លាប់ដោយជំងឺ ពុំមានពាក់ព័ន្ធនឹងរឿងអ្វីផ្សេងឡើយ ៕
