លោក Trump បង្ហាញខ្លួននៅមុខចៅក្រម បន្ទាប់ពីមហាគណៈវិនិច្ឆ័យបានចោទប្រកាន់ រូបលោកពីបទព្រហ្មទណ្ឌ
សហរដ្ឋអាមេរិក ៖ ក្រុមអ្នកគាំទ្រនិងអ្នកប្រឆាំងលោក Donald Trump អតីតប្រធានាធិបតីសហរដ្ឋអាមេរិក នៅថ្ងៃអង្គារនេះ បានប្រឈមមុខគ្នានៅក្បែរបរិវេណតុលាការព្រហ្មទណ្ឌ Manhattan នៅក្នុងទីក្រុងញូវយ៉ក មុនពេលលោក Trump បង្ហាញខ្លួននៅមុខចៅក្រម បន្ទាប់ពីមហាគណៈវិនិច្ឆ័យបានចោទប្រកាន់រូបលោកពីបទព្រហ្មទណ្ឌ។
មន្ត្រីមានសមត្ថិកិច្ច ត្រូវបានដាក់ពង្រាយដើម្បីរក្សាសន្តិសុខសណ្តាប់ធ្នាប់ ខណៈក្រុមអ្នកសារព័ត៌មានជាច្រើនក៏កំពុងប្រមូលផ្តុំគ្នាដើម្បីផ្តិតយករូបភាពនិងធ្វើសេចក្តីរាយការណ៍ផ្ទាល់អំពីការនាំខ្លួនឬការបង្ហាញខ្លួនរបស់លោក Trump ទៅកាន់តុលាការ ដែលនឹងធ្វើឡើងនៅវេលាម៉ោងប្រមាណ ២ រសៀលម៉ោងនៅទីក្រុងញូវយ៉ក សហរដ្ឋអាមេរិក។
ការនាំខ្លួនលោក Donald Trump មកកាន់តុលាការនៅថ្ងៃអង្គារនេះ ក្នុងទីក្រុង New York សហរដ្ឋអាមេរិក ត្រូវគេរំពឹងថា នឹងប្រើរយៈពេលតិចជាងមួយម៉ោង ប៉ុន្តែសំណុំរឿងក្តីក្តាំមួយនេះ នឹងអាចប្រើពេលរាប់ឆ្នាំទៀត ដើម្បីបញ្ចប់ ខណៈពេលដែលអតីតប្រធានាធិបតីដែលសម្បូររឿងក្តីក្តាំមួយនេះ បង្កើតក្រុមការពារក្តីមួយ ដែលអាចធ្វើឱ្យសំណុំរឿងមួយនេះអាចអូសបន្លាយពេលរហូតដល់ក្រោយការបោះឆ្នោតប្រធានាធិបតីសហរដ្ឋអាមេរិកឆ្នាំ ២០២៤ ដែលលោកកំពុងឈរឈ្មោះធ្វើជាបេក្ខជនមួយរូបផងដែរ។
លោក Trump បានក្លាយជាអតីតប្រធានាធិបតីសហរដ្ឋអាមេរិកលើកដំបូងគេ ដែលប្រឈមនឹងបទចោទព្រហ្មទណ្ឌ នៅពេលដែលមហាគណៈវិនិច្ឆ័យក្នុងទីក្រុង New York កាលពីសប្តាហ៍បានបោះឆ្នោត ឱ្យចោទប្រកាន់លោក នៅក្នុងសំណុំរឿងផ្តល់លុយបំបិទមាត់តារាសម្តែងអាសអាភាសម្នាក់គឺនាង Stormy Daniels កាលពីឆ្នាំ ២០១៦។
ដីកាចោទប្រកាន់ ដែលនៅបិទជិតនៅឡើយ ត្រូវគេរំពឹងថានឹងត្រូវផ្សព្វផ្សាយជាសាធារណៈក្រោយការបង្ហាញខ្លួនរបស់លោក Trump នៅក្នុងតុលាការនៅថ្ងៃអង្គារនេះ។
នៅក្នុងការនាំខ្លួនលោក Trump មកកាន់តុលាការ ឬការបង្ហាញខ្លួនក្នុងតុលាការជាលើកដំបូងនេះ ចៅក្រមទទួលបន្ទុកក្នុងសំណុំរឿងនេះ គឺលោក Juan Merchan។ ចៅក្រមរូបនេះនឹងអានបទចោទប្រកាន់ទៅលើលោក Trump ហើយជារឿងដែលគេធ្លាប់តែឃើញសម្រាប់ចុងចោទនានាក្នុងពេលកន្លងទៅនោះ គឺលោក Trump នឹងបដិសេធរាល់ការចោទប្រកាន់ទាំងនោះ ដោយនិយាយថាលោកគ្មានកំហុសឡើយ៕ ប្រភព ៖ VOA
