កូនកម្លោះពីរនាក់ ជាបងប្អូននឹងគ្នា រៀបការកូនក្រមុំជាកូនភ្លោះ២គូ ក្នុងថ្ងៃតែមួយ
ខេត្តប៉ៃលិន ៖ ពិតជាពិធីមង្គលការ ដែលប្លែក នាំឲ្យមានការចាប់អារម្មណ៍ពីសាធារណៈជននានា សម្រាប់ដើមឆ្នាំ២០២៣នេះ ដោយហេតុថា ស្ត្រីជាបងប្អូនភ្លោះ បានរៀបមង្គលការក្នុងថ្ងៃតែមួយ ជាមួយកូនប្រុសត្រូវជាបងប្អូនបង្កើតជាមួយគ្នា។
អាពាហ៍ពិពាហ៍នេះ រៀបចំឡើងកាលពីថ្ងៃទី០១ ខែមេសា ឆ្នាំ២០២៣ ហើយចាត់ទុកជារឿងចម្លែក ពុំធ្លាប់មាន ដែលកូនកម្លោះពីរនាក់ ជាបងប្អូនបង្កើតនឹងគ្នា រស់នៅខេត្តប៉ៃលិន បានស្គាល់គ្នាជាមួយកូនក្រមុំ ជាកូនភ្លោះ ដែលជាអ្នករដើនៅខេត្តបាត់ដំបង តាមរយ:ហ្វេសប៊ុក អស់រយ:ពេលជាង ១ឆ្នាំ រួចក៏ឈានដល់បង្កើតចំណងអាពាហ៍ពិពាហ៍ ជាមួយគ្នា។
ឪពុកកូនកម្លោះ បានឲ្យដឹងថា កូនប្រុសរបស់គាត់ទាំងពីរ បន្ទាប់ពីបានសន្សំលុយចេញទៅរកការងារធ្វើនៅប្រទេសថៃគ្រប់ចំនួន ក៏បានចូលស្តីដណ្តឹងកូនក្រមុំ ជាកូនស្រីភ្លោះ ដើម្បីរៀបមង្គលការ ចូលផ្ទឹមទាំងពីរគូ ក្នុងរោង និងក្នុងថ្ងៃតែមួយ ជាមួយគ្នាតែម្តង។
លោកឪពុកខាងកូនកម្លោះ បន្តថា រូបគាត់ បានស្នើសុំម្តាយខាងកូនស្រីភ្លោះទាំងពីរ យកមករៀបចំផ្សំផ្គុំ ឬរៀបមង្គលការ នៅឯផ្ទះរបស់ខ្លួន នៅខេត្តប៉ៃលិន ដោយសារតែ គ្រួសារខាងកូនស្រី មានម្តាយជាស្ត្រីមេម៉ាយ ហើយមានជីវភាពខ្វះខាត។
ឪពុកកូនកម្លោះ ឈ្មោះ ហាម ចាន់តារា អាយុ ៥៧ឆ្នាំ និងប្រពន្ធ ឈ្មោះ ម៉ៅ សុចាន់ណា រស់នៅក្នុងភូមិអន្លង់រក្សា ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
ឪពុកកូនកម្លោះ បានឱ្យដឹងថា កូនប្រុស របស់គាត់ ដែលរៀបការ ក្នុងថ្ងៃតែ១ ពេលនេះ មានឈ្មោះ ៖ ឈ្មោះ រ៉ា ចាន់រក្សា អាយុ ២០ឆ្នាំ និង ឈ្មោះ រ៉ា ចាន់ខាំឈីត អាយុ ១៨ឆ្នាំ។
រីឯខាងកូនក្រមុំភ្លោះ ឈ្មោះ ៖ ម៉ាប់ ផល្លី អាយុ ១៨ឆ្នាំ និង ម៉ាប់ ផល្លា អាយុ ១៨ឆ្នាំ ដូចគ្នា មានស្រុកកំណើត នៅចំណុចប្រឡាយ៧០ ក្នុងភូមិគោកត្រប់ ឃុំតាម៉ឺន ស្រុកថ្មគោល ខេត្តបាត់ដំបង ដោយម្តាយ មានឈ្មោះ គយ ចន្ធូ ជាស្រ្តីមេម៉ាយ។
ឪពុកកូនកម្លោះ បន្តទៀតថា ក្រោយពេលចូលស្តីដណ្តឹង ខាងកូនស្រីរួច គឺរូបលោក មិនទុកយូរទេ ដោយបាននាំយកកូនប្រសារស្រី របស់គាត់ មករៀបចំពិធីផ្សំផ្គុំកូនទាំង ២គូ នៅឯផ្ទះរបស់ខ្លួន។ ហើយ ម្តាយខាងស្រី គាត់ក៏មានការយោគយល់ ដោយយកថ្លៃទឹកដោះ កូនម្នាក់ៗ ត្រឹមចំនួន ៥០០ដុល្លារតែប៉ុណ្ណោះ។
លោកបន្តថា មុនដំបូង ពួកគេបានស្គាល់គ្នា តាមរយ:ការលេងហ្វេសប៊ុក ខណ:កូនប្រុសទាំងពីរនាក់របស់គាត់ កំពុងធ្វើការនៅប្រទេសថៃ។ ក្រោយមក កូនប្រុសម្នាក់ ក៏បានវិលត្រឡប់មកពីប្រទេសថៃ មកស្រុកកំណើតវិញ ដើម្បីទៅលេងផ្ទះខាងកូនក្រមុំ ក៏ចាប់ចិត្តស្រឡាញ់ កាន់តែខ្លាំង។ ហើយ បន្ទាប់មក ក៏ឈានដល់ធ្វើពិធីបង្គោលការតែម្តង ដោយកូនប្រុសច្បង រៀបការជាមួយកូនស្រីភ្លោះបង ហើយកូនប្រុសប្អូន រៀបការជាមួយកូនស្រីភ្លោះប្អូន មានន័យថា បង យកបង ប្អូន យកប្អូន។
លោក បន្តថា បន្ទាប់ពីរៀបអាពាហ៍ពិពាហ៍រួចរាល់ កូនប្រុសរបស់គាត់ទាំងពីរនាក់ នឹងទៅរស់នៅផ្ទះខាងម្តាយក្មេក ហើយរកការងារធ្វើនៅក្នុងស្រុកវិញ គឺឈប់ចេញទៅធ្វើការងារ នៅប្រទេសថៃទៀតហើយ៕
