សម្តេចតេជោ ហ៊ុន សែន ៖ ប្រជាពលរដ្ឋខ្មែរ និងភ្ញៀវអន្តរជាតិ អាចចូលទស្សនាស៊ីហ្គេម ដោយមិនគិតថ្លៃ
រាជធានីភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា «គ្មានការបង់ប្រាក់ណាមួយត្រូវធ្វើ សម្រាប់អ្នកចូលទៅក្នុងពិធីបើក ពិធីបិទ និងចូលទៅទស្សនាគ្រប់វិញ្ញាសារនៃការប្រកួត។ មិនអនុញ្ញាតឱ្យមានអ្នកលក់សំបុត្រនោះឡើយ ប្រជាជន មិនត្រូវការបង់ថ្លៃទេ»។
នេះជាសាររបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចេញនារសៀលថ្ងៃទី៣០ ខែមីនា ឆ្នាំ២០២៣។
សាររបស់សម្តេចតេជោ ដែលមានរយៈពេលប្រមាណ ៥នាទី ត្រូវបានធ្វើឡើង ក្រោយមានការចែកចាយព័ត៌មានយ៉ាងផុសផុលថា នឹងមានការលក់សំបុត្ រដើម្បីចូលទស្សនាពិធីបើក និងពិធីបិទព្រឹត្តិការណ៍កីឡាស៊ីហ្គែមដែលកម្ពុជាធ្វើជាម្ចាស់ផ្ទះនាពេលខាងមុខនេះ។
សម្តេចតេជោ បានបន្តថា «ក្នុងករណីមានការទាមទារណាមួយ សូមប្រើហ្វេសប៊ុកបញ្ជូនព័ត៌មាន តាមឱ្យឆាប់តាមដែលអាចធ្វើទៅបាន ដើម្បីយើងរកឃើញនូវជនអាក្រក់ដែលបង្កប់ខ្លួន នៅក្រោមរូបភាព នៃការរៀបចំប្រកួតកីឡាស៊ីហ្គេម»។
ក្នុងសារជាសំឡេងផ្ញើជូនជនរួមជាតិ នៅល្ងាចថ្ងៃទី៣០ ខែមីនា ឆ្នាំ២០២៣ នេះ សម្តេចតេជោ ហ៊ុន សែន បានបញ្ជាក់ថា សម្តេចបានទទួលព័ត៌មានពី សម្តេច ទៀ បាញ់ រដ្ឋមន្ត្រីក្រសួងការពារជាតិ រឿងមានការលក់សំបុត្រ សម្រាប់ចូលទស្សនាព្រឹត្តិការណ៍ប្រកួតកីឡា ស៊ីហ្គេម ដែលកម្ពុជា ធ្វើជាម្ចាស់ផ្ទះរៀបចំការប្រកួត នៅខែឧសភា ខាងមុខនេះ។
សម្តេចតេជោ ហ៊ុន សែន បានប្រកាសយ៉ាងច្បាស់ថា មិនឱ្យលក់សំបុត្រសម្រាប់ព្រឹត្តិការណ៍កីឡាស៊ីហ្គេម រាប់ទាំងកម្មវិធីបើក និងបិទព្រឹត្តិការណ៍ជាប្រវត្តិសាស្ត្រនេះជាដាច់ខាត។ ប្រមុខដឹកនាំរាជរដ្ឋាភិបាល បានថ្លែងថា យើងបានចំណាយប្រាក់យ៉ាងច្រើន ទាំងមូលដ្ឋានសម្ភារៈ បច្ចេកទេស ក៏ដូចជាជំនួយពីមហាមិត្តចិន សម្រាប់ការកសាងនូវមូលដ្ឋាន នៃការប្រកួត ព្រមទាំងចំណាយនូវធនធានជាច្រើន សម្រាប់ការកសាងនូវរចនាសម្ព័ន្ធដទៃទៀត រាប់រយលានដុល្លារ និងចំណាយជាច្រើនឆ្នាំ ទម្រាំកើតចេញនូវការប្រកួត។ ដូច្នេះសម្តេចតេជោ បញ្ជាក់ថា សម្តេចមិនយល់ព្រមដាច់ខាត ឱ្យមានការលក់សំបុត្រ ទាំងពេលចូលបើក និងពិធីបិទ ក៏ដូចជាពេលប្រកួតកីឡាផ្សេងៗទៀត ក្នុងរយៈពេលស៊ីហ្គេមនេះ។
សម្តេចតេជោ ហ៊ុន សែន បានលើកឡើងថា ការផ្សព្វផ្សាយពីការលក់សំបុត្រ និងតម្លៃសំបុត្រ ចូលទស្សនាការប្រកួតកីឡាស៊ីហ្គេម នៅលើវេបសាយផ្នែកកីឡានាពេលថ្មីៗនេះ គឺ «មិនមានការឯកភាពយល់ព្រមពីសម្តេច ទៀ បាញ់» ដែលទទួលបន្ទុករៀបចំការប្រកួតស៊ីហ្គេម ហើយក៏ «មិនមានការឯកភាពយល់ព្រមពីសម្តេច ក្នុងឋានៈជានាយករដ្ឋមន្ត្រីកម្ពុជាឡើយ»។
ក្នុងសារសម្លេងដដែល សម្តេចតេជោ ហ៊ុន សែន បានដាក់បទបញ្ជាយ៉ាងម៉ឺងម៉ាត់ ៣ចំណុច៖ ទី១-មិនឱ្យមានការលក់សំបុត្រ ទាំងការចូលបើក និងពិធីបិទការប្រកួតស៊ីហ្គេម។ ទី២-បើកឱ្យមហាជន ចូលទស្សនាដោយសេរី ដោយគ្មានការបង់ប្រាក់ និងទី៣-ចំពោះរាល់ការប្រកួតតាមវិញ្ញាសានានា ក៏មិនត្រូវបង់ថ្លៃនោះឡើយ។ «យើងបានធ្វើកិច្ចការងារច្រើនហើយ។ ដូច្នេះសូមអ្នកទាំងអស់គ្នា យកចិត្តទុកដាក់។ «ធ្វើបុណ្យ ១០០សំពៅ ទោស១ ចូលទៅ រលាយបាត់អស់»។
សូមចាំពាក្យនេះ។ យើងចាយលុយរាប់រយលានដុល្លារ សម្រាប់រៀបចំការប្រកួតស៊ីហ្គេមនេះ តើយើងប្រមូលលុយ តាមរយៈការលក់សំបុត្រឱ្យជនជាតិឯង ដែលត្រូវចូលទស្សនានេះ របៀបម៉េចទៅ? ហើយតើបានប៉ុន្មានទៅ? បើអ្នកទាំងអស់គ្នា ចង់បានលុយ សូមមកយកពីខ្ញុំ។ ខ្ញុំទទួលខុសត្រូវ»។ នេះជាការបញ្ជាក់របស់សម្តេចតេជោ ហ៊ុន សែន។
ទន្ទឹមនឹងនោះផងដែរ សម្តេចតេជោ បានសម្តែងការហួសចិត្ត និងមិននឹកស្មានដល់ ថា មន្ត្រីរបស់យើងមួយចំនួន ខ្វះការគិតគូរយកចិត្តទុកដាក់លើបញ្ហានេះ។ នេះជាការស្តីបន្ទោសលើកដំបូង របស់សម្តេច តាំងពីការរៀបចំស៊ីហ្គេម។ ប៉ុន្តែនេះ មិនមែនជាកំហុស របស់សម្តេច ទៀ បាញ់ នោះឡើយ។ តែ សម្តេច ប្រកាសថា សម្តេច នឹងខិតខំរកមុខអ្នកលក់សំបុត្រស៊ីហ្គេមនេះ ដែលនេះ មិនមែនជាការលេងសើចទេ តែនេះជាការទទួលខុសត្រូវ របស់រាជរដ្ឋាភិបាល ចំពោះមុខប្រជាជន ដែលយើងបានចំណាយពេលរង់ចាំអស់ពេល ៤៤ឆ្នាំ និងរង់ចាំយ៉ាងច្រើន ដើម្បីធ្វើជាម្ចាស់ផ្ទះ រៀបចំការប្រកួតកីឡាស៊ីហ្គេមដ៏អស្ចារ្យមួយនេះ៕
