សមត្ថកិច្ច ចាប់ខ្លួនជនដៃដល់ សម្លាប់ស្រ្តីម្នាក់ដាក់ក្នុងរថយន្ត PRIUS ប្លុងចោលក្នុងក្រុងបាត់ដំបង បានហើយ
ខេត្តបាត់ដំបង ៖ សមតហថកិច្ចនគរបាល ខេត្តបាត់ដំបង បានឲ្យដឹងថា ជនដៃដល់ ដែលសម្លាប់ស្រ្តីម្នាក់ដាក់ក្នុងរថយន្ត PRIUS ហើយយកទៅប្លុងចោល នៅក្រោយផ្សារភូពុយ ក្រុងបាត់ដំបង ដែលគេបានប្រទះឃេីញ កាលពីថ្ងៃទី១៤ ខែ កញ្ញា ឆ្នាំ២០២២ ត្រូវបានសមត្ថកិច្ចនគរបាលខេត្តបាត់ដំបង សហការឃាត់ខ្លួន បានហេីយនៅក្នុងប្រទេសថៃ។
ការចាប់ខ្លួននេះ ធ្វើឡើងកាលពីថ្ងៃអាទិត្យ ទី២៥ ខែកញ្ញា ឆ្នាំ២០២២ នៅក្នុងប្រទេសថៃ។
សមត្ថកិច្ចនគរបាល នៃស្នងការដ្ឋាននគរបាល ខេត្តបាត់ដំបង បញ្ជាក់ថា ជនសង្ស័យម្នាក់នោះឈ្មោះ មាស ពេជ្របូរមី ភេទប្រុស អាយុ ២៨ឆ្នាំ បច្ចុប្បន្នរស់នៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ មានមុខរបរមិនពិតប្រាកដ។
សមត្ថកិច្ចបញ្ជាក់ថា កាលពីព្រលប់ថ្ងៃទី១៤ ខែកញ្ញា ឆ្នាំ២០២២ មានរឿងហេតុភ្ញាក់ផ្អេីលមួយ ដោយសារគេបានប្រទះឃើញស្ត្រីម្នាក់ បានស្លាប់នៅបាំងខាងក្រោយ នៃរថយន្តម៉ាកព្រូស PRIUS ព៌ណទឹកប្រាក់ ពាក់ស្លាកលេខ ភ្នំពេញ2BQ-1371 ស្ថិតនៅខាងក្រោយ បរិវេណផ្សារទំនើបភូពុយ ស្ថិតក្នុងភូមិអញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង។
តាមរយៈការស្រាវជ្រាវ ដែលបានធ្វេីឡេីងនៅថ្ងៃបន្ទាប់ បានឱ្យដឹងថា ស្រ្តីជាជនរងគ្រោះមានឈ្មោះ ឌីម សោភា អាយុ ៣៤ឆ្នាំ មានស្រុកកំណើតនៅខេត្តកំពង់ចាម ហើយបច្ចុប្បន្នរស់នៅ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ មានមុខរបរជាអ្នកសំអាង និងកែសម្ផស្ស ព្រមទាំងលក់ដីឡូត៍ និងលក់អនឡាញទៀតផង។
ស្រ្តីរូបនេះ បានចាកចញពីផ្ទះជាមួយរថយន្តខាងលេី កាលពីថ្ងៃកាន់បិណ្ឌទី១ គឺអំឡុងថ្ងៃ១១ ខែកញ្ញា ឆ្នាំ២០២២ ហេីយបាត់ការទាក់ទងតាមទូរស័ព្ទចាប់ពីថ្ងៃទី១២ ខែកញ្ញា ឆ្នាំ២០២២ រហូតដល់ពេលប្រទះឃេីញរថយន្ត និងសាកសពតែម្តង។
នៅចំពោះមុខសមត្ថកិច្ចនគរបាល ជនដៃខាងលើនេះ បានសារភាពថា រូបគេពិតជាបានសម្លាប់ស្រ្តីជនរងគ្រោះពិតមែន ដែលការសម្លាប់នេះប្រព្រឹត្តនៅក្នុងរថយន្ត បន្ទាប់ពីរូបគេនិងជនរងគ្រោះកេីតជម្លោះពាក្យសំដីជាមួយគ្នា ក្នុងពេលរួមធ្វេីដំណេីរតាមរថយន្ត។ ជនសង្ស័យបន្តថា ចំណុចដែលរូបគេ បានប្រព្រឹត្តិបទល្មើសនេះ ធ្វេីឡេីងនៅជាយរាជធានីភ្នំពេញ រួចបន្តបេីករថយន្តដឹកសពស្រ្តីរូបនោះ យកមកប្លុងចោលនៅក្រោយផ្សារភូពុយ ក្នុងក្រុងបាត់ដំបងនាអំឡុងថ្ងៃទី១២ ខែកញ្ញាឆ្នាំ២០២២ រួចគេចខ្លួនបាត់។
សមត្ថកិច្ច បានប្រទះឃើញសាកសពស្ត្រីរងគ្រោះ នៅរសៀលថ្ងៃទី១៤ ខែកញ្ញា ឆ្នាំ២០២២ ក្នុងរថយន្ត បន្ទាប់ពីមានក្លិនស្អុយភាយចេញពីក្នុងរថយន្តនោះ។
យ៉ាងណាក្តី ជនសង័្សយខាងលេី បានត្រឹមតែឆ្លេីយប្រាប់សម្ថកិច្ចថា រូបគេជ្រុលដៃរហូតធ្វេីឱ្យស្រ្តីរូបនេះស្លាប់ ក្នុងពេលដែលរូបគេប្រេី ហិង្សាទៅលេីស្ត្រីរូបនេះ ខណៈកំពុងមានទំនាស់ពាក្យសំដីជាមួយគ្នា។
បច្ចុប្បន្ននេះ សមត្ថកិច្ចនគរបាលកំពុងបន្តធ្វេីការស្រាវជ្រាវបន្ថែមទៀតនិងរៀបចំសំណុំរឿងបញ្ជូនទៅអនុវត្តទោសតាមផ្លូវច្បាប់៕ ប្រភព ៖ ស្នងការដ្ឋាននគរបាល ខេត្តបាត់ដំបង
